Drejtori sportiv i Tiranës, Arb Laçi, foli për mediat menjëherë pas hedhjes së shortit të gjysmëfinaleve të Kupës së Shqipërisë.
Tirana do të luajë ndaj Bylisit dhe Laçi pranoi se do të ishte më pozitive nëse ndeshjet gjysmëfinale do të luheshin me një ndeshje teke, si dhe mendon se është në avantazh të bardhebluve që ndeshjen e parë do e luajnë në transfertë.
“Besoj se do të ishin të ngjashme dhe dy skuadrat e tjera. Nuk jemi as të kënaqur, as të mërzitur. Një gjë e kemi pozitive, që do ta luajmë jashtë ndeshjen e parë. Dhe para shortit, këtë gjë do të doja. Ne jemi në garë për të dy objektivat, si në kampionat, ashtu dhe në Kupë. Jemi tre ndeshje larg Kupës, dhe pse jo t’i fitojmë të dy trofetë në këtë vit jubilar.
Do kishte qenë më mirë të luanim me ndeshje teke në këto gjysmëfinale, pasi elementi fushë nuk është se ka shumë efekt në këto kushte. Por kështu është vendosur, do të respektojmë atë që është vendosur nga klubet, pasi ka pasur një diskutim mes klubeve dhe FSHF-së nëse mund të bëhet me ndeshje teke, por kështu është vendosur dhe të fitojë më i miri”, u shpreh Laçi.
