Nga Boldnews.al
Fëmijë të vegjël me probleme neurologjike që dergjen në krahët e prindërve, presin me sytë nga një dhomë e vogël ku ndodhet aparatura ekzaminuese e EEG (e njohur si ezhe). “Nuk punon, shkonin në privat”-është përgjigjia që vjen nga tre mjekët neuropediatër dhe infermierja ekzaminuese, që hap e mbyll një derë, pa kryer asnjë ekzaminim.
Ky ritual ka gjashtë muaj që vijon dhe deri më tani nuk është marrë asnjë masë. Prindërit me fëmijët që vuajnë nga probleme neurologjike, shpesh edhe fizike, detyrohen të numërojnë ato pak të holla dhe shkojnë të imponuar në një klinikë private e cila si për “ironi”, është hapur pikërisht në kohën që aparatura në spital doli “jashtë funksionit”.
Po si qëndron e vërteta e saj? Boldnews.al ka mësuar nga burime të konfirmuara se aparatura është funksionale, madje pak muaj më parë erdhën edhe inxhinierët që mirëmbajnë pajisjet spitalore dhe konstatuan se është në gjendje shumë të mirë. Por këtë nuk e “pranojnë” tre mjekët neuropediatër, të cilët urdhërojnë ekzeminuesen e EEG-së që të mos kryejnë asnjë veprim.
Pacientët e vegjël, disa prej të cilëve dukshëm me probleme të shëndetit mendor, por edhe fizik, detyrohen që të shkojnë për ekzaminim në klinikën private ku kryhet ezhe specifike për fëmijë dhe ndodhet përballë spitalit. Tarifa është e kripur për ta, e cila kap shumën e 55 mijë lekëve të vjetra.
Një i mitur pacient me probleme neurologjike e ka të nevojshme ekzeminimin me EEG, të paktën dy herë në vit. Gjithashtu pjesa më e madhe vijnë nga rrethet kjo për shkak se në spitalet rajonale mungon aparatura e EEG-së për fëmijë (është më specifike dhe nuk është e njëjtë me atë të të rriturve).
Mjekët nëpër rrethe i dërgojnë në Tiranë, duke u plotësuar edhe dokumentacionin e nevojshëm, por sapo futen në konsultat pediatrike u vjen përgjigjia: “ezheja nuk punon, shkoni në privat”-duke i drejtuar aty pranë në klinikën private. Vetë mjekët duket se janë të lidhur me këtë “aferë” që sot rëndon jo vetëm mbi shëndetin e atyre fëmijëve që vuajnë, por edhe të prindërve të tyre. Pacientët që shfaqin të tilla probleme kanë nevojë për kujdestarinë e të paktën njërit prej prindërve, çka sjell automatikisht edhe pamundësinë për të punuar, por kur shkojnë tek “shëndetësia falas”, u vjen një faturë që mbi ta rëndon shumë.
Për të qenë në “rregull” me letra, është bërë kërkesë nga mjekët për dërgimin e një aperture të re, por nga ana tjetër, ka një raport të inxhinierëve të mirëmbajtjes të cilët shprehen se ajo nuk ka asnjë problem, përkundrazi është në gjendje shumë të mirë teknike.
Ky “ngërç” ka gjashtë muaj që nuk zgjidhet dhe duket se askush aty në QSUT nuk do që ta zgjidhet. Për të janë në dijeni jo vetëm mjekët por edhe administrata e Drejtoririsë së QSUT-së, e cila çdo muaj mban në listpagesat e saj një infermiere të EEG-së, e cila nuk ka realizuar qoftë edhe një veprim të vetëm, jo për një kohë të shkurtër, por për gjashtë muaj radhazi.
“Të gjithë të lumtur”, si mjekët, klinika private, administratorët e pavionit dhe drejtuesit e QSUT-së… për një fakt të thjesht: brenda një dite mund të kenë nevojë 20-25 pacientë për EEG dhe llogaria bëhet lehtë 20 pacientë shumëzuar për 55 mijë lekë=…. E dinë mirë këtë benefit monetar të përditshëm të gjithë ata bluza të bardha dhe të veshurit shik në drejtorinë e QSUT-së…!
