Nga Boldnews.al
Ka një trill në analizat e analistëve nihilist mediatik, që nëpërmjet penës së tyre të ngjyer me bojën e parasë, apo verbit të përlyer nga goja e yndyrës së pushtetit, po hapin lajmin e rremë se Rama dhe Basha do të bashkëqeverisin pas zgjedhjeve të vitit 2021. Këtë e “argumentojnë” me lloj e soj stisjesh, që gatuhen enkas në zyrat e kryeministrisë nga Fug (k)sat e pushtetit me izmin fundor të Ramës, duke u përshfaqur në mediat e shkruara dhe vizive si gjetje dhe hulumtime të “thelluara” të artikujshkruesve apo të folësve televiziv.
Është një strategji e mirëfilltë që po përsërit vitin 2017, ku u injektua në popull “Fake Neës” më i madh se Rama dhe Basha kishin rënë dakord të ndanin pushtetin para dhe pas zgjedhor, cilido të ishte rezultati. Kjo solli një apati të madhe të votuesve tradicional të së djathtës, duke mos e harxhuar votën e tyre, me idenë se ajo nuk ka vlerë, për aq kohë sa po u tradhtoheshin idealet nga marrëveshje okulte. Nga ana tjetër Rama punoi në errësirë më grupe kriminale të cilat u vendosën në shërbim të pushtetit të rilindjes në shitblerjen masive të votave.
Pas shtatë vitesh qeverisje, kryeministri Edi Rama ngado të vërtitet nuk ka më as forcë dhe strategji për të gënjyer. Ka dhënë dhe thënë kaq shumë mashtrime në dy mandate qeverisëse sa i ka ezauruar të gjitha. I ka mbetur vetëm një mënyrë: Përhapja e qëllimshme e informacioneve të rreme me synim mbajtjen e pushtetit, çmendurisht edhe për katër vitet e ardhshme.
Rama nuk bën gjë tjetër përveçse çdo javë analizon sa pikë ka humbur e sa fituar, për fatin e tij të keq, (vetëm të tij dhe Rilindjes që përfaqëson pushtetin), ka rënie të ndjeshme. Ata nuk lidhen vetëm me pasojat e termetit të 26 nëntorit të vitit të kaluar dhe të pandemisë së koronavirusit të këtij viti, por me korrupsionin në nivele të larta; përlyerjen e frikshme të ministrave të tij në afera të rënda korruptive; koncesionet si barrë që nuk mbahet nga gjunjët e lodhur të popullsisë dhe një paaftësi dhe arrogancë e pushtetit, deri në marrëzi.
Kryeministri Rama di ti lexojë mirë zullumet e tij dhe të qeverisë që drejton, por ai as nuk tenton që qoftë edhe për çështje imazhi, apo mashtrimi masiv publik të bëjë ndonjë lëvizje për të bërë shembull ndonjë ‘qafir ministër’ që e ka mbushur dhe derdhur me kohë kupën e korrupsionit dhe përveçse hajditë me damkë, shfaqen edhe si antipatikë në pupull.
Vetë kryeministri Edi Rama sa më shumë të shfaqet në media, aq me tepër humbet pikë, po ashtu edhe drejtuesit e tjerë të qeverisë dhe parlamentit drejt gropës së humbjes së votave po e çojnë. Çfarë ka mbetur dhe çfarë po tenton Rama?
Së pari ka nxitur një formë mjaft të ulët propagandistike duke relativizuar deri në absurd problemet. Ai nuk mohon më, pasi të gjitha dëmet janë të dukshme, por Rama ka nxjerrë në tregun publik një luguni të paguarish nga llumi i pushtetit për të propaganduar jo më arritjet e qeverisë, të cilat nuk ekzistojnë as në iluzione, por sulmin ndaj kundërshtarit. Me konceptin të gjithë janë njësoj, që Rama “nuk di gjë” për ato që shkojnë keq në vend, apo që janë “disa ministra që po i marrin erzin të ‘ndershmit Ramë. Edhe kaq nuk i mjafton, ndaj ai dukshëm po synon të hedhë në qarkullim idenë se ka marrëveshje të fshehtë mes Bashës apo Ramës dhe se çfarëdo të ndodhë do të jenë të gjithë njësoj!
