Nga BoldNews.al
Katër nga pesë tendera mbi fond limit mbi 1milion euro, të zhvilluar nga Operatori i Sistemit të Transmetimit (OST) prej Janarit 2019, kohë kur drejtohet nga Skerdi Drenova, janë fituar nga kompanitë e biznesmenit Shpëtim Cinga.
Këto “rastësi” bëhen akoma më të dyshimta pas konstatimit se “Shansi Invest” dhe “G.A.C” janë shpallur fitues në tenderat me vlerë totale rreth 20 milionë euro, në procedura përgjithësisht pa konkurencë.
“Boldnews.al” ka kryer një verifikim në të dhënat e prokurimeve publike mbi ndërmarrjet shtetërore.
OST, e drejtuar prej gati 18 muajsh nga Drenova, një ish-vartës i Erion Veliajt në Bashkinë e Tiranës, është një prej kompanive publike që kryen prokurime me vlera të larta monetare, në funksion të përmirësimit të rrjetit të transmetimit të energjisë elektrinike.
Hulumtimi gazetaresk zbuloi se kompania ‘Shansi Invest”, me pronar Shpëtim Cinga dhe “G.A.C”, në të cilën është bashkëpronare vajza e tij, Hajrie Cinga, kanë qenë “fatlumë” në gara pa konkurencë, të zhvilluar nga Operatori i Sistemit të Transmetimit (OST), sidomos gjatë kohës që ndërmarrja drejtohet nga Skerdi Drenova.
Tenderat 20 milionë euro për 18 muaj
– Në 15 Maj 2020, OST përfundoi tenderin “Zgjerimi i sistemit të lokalizimit të defekteve në Linjat e Tensionit të Lartë”, me fond limit 100 milionë lekë të reja pa TVSH.
Tenderi u zhvillua pa konkurencë. Në të mori pjesë vetëm kompania “G.A.C” shpk, e cila edhe u shpall fituese.
Shoqëria ‘G.A.C” është themeluar në vitin 2016 dhe aktualisht është në pronësi të K. Alimadhi me 51% të aksioneve dhe Hajrie Cinga, me 49 % të aksioneve.
– Në datë 20 Janar 2020, OST shpall rezultatet e tenderit “Blerje e një Autotransformatori të ri 300 MVA, 400/230 kV për N/ST Tirana 2”, me fond limit 293. 279. 980 lekë të reja pa TVSH.
Në tenderin marrin pjesë 5 operatorëve ekonomikë. OST skualifikoi 4 konkurentë, duke lënë në garë vetëm bashkimin e operatorëve “Shansi Invest”-“Alb Star”-“GMK Power”, i cili u shpall edhe fitues.
– Në Shtator 2019, OST mbyll tenderin “Ndërtim i linjës 220 kV me dy qarqe Komsi-Shumat”, me fond limit mbi 1 miliard lekë të reja pa TVSH.
Në procedurën tenderuese marrin pjesë 3 operatorëve ekonomikë. Pas hapjes së dokumentave, OST e drejtuar nga Skerdi Drenova vendos skualifikimin e dy operatorëve.
Në garë mbetet vetëm një konkurent, i cili shpallet edhe fitues. Konkretisht, bashkimi i operatorëve i udhëhequr nga “Shansi Invest” i biznesmenit Shpëtim Cinga, e pjesëmarrës të tjerë “G.A.C” e Hajrie Cinga, si edhe “Lala” shpk e “Pastrime Silvio”.
– Në Qershor 2019, OST e drejtuar nga Skerdi Drenova, përfundon procedurat e prokurimit publik për “Ndërtim i Nënstacionit 220/110/35 kV, Shumat dhe i traktit 220 kV në Nënstacionin 220/110/10 kV, Komsi”, me fond limit 730 milionë lekë të reja, pa TVSH.
Edhe në këtë tender marrin pjesë 3 operatorë, dy prej të cilëve nuk kishin dorëzuar as dokumentacion dhe as ofertë ekonomike.
Për këtë arsye, OST shpalli fitues të tenderit konkurentin e vetëm që kishte dorëzuar ofertë ekonomike-bashkimin e operatorëve “Shansi Invest”- “Everest” shpk – “La-Or” shpk.
