I ftuar në ‘Çim Peka Live’ në Syri Tv, nënkryetari i LSI-së, Petrit Vasili, ka komentuar fillimisht kërcënimin e Ramës ditën e sotme nga foltorja e Kuvendit, ku tha se do ta grisë marrëveshjen e Reformës Zgjedhore.
I pyetur nëse ishte një kërcënim ndaj opozitës apo Brukselit, Vasili tha se Rama nuk ka kërcënuar askënd, thjesht po trimëron veten para një parlamenti të tillë.
“Anëtarët e Këshillit Politik kanë vetëm një kërcënim, të zbatojnë me korrektësi marrëveshjen zgjedhore që kanë firmosur.
Kërcënimi është për Edi Ramën që po kërkon ti ikë marrëveshjes. Marrëveshja ishte transparente, nuk kishte ekuivoke që ishte kështu apo ashtu.
Marrëveshja ishte diskutim principial. Është as më pak e as më shumë që Rama nuk ecën dot me standardin e mbajtjes së fjalës.
Tani ai është i imponuar të mbajë fjalën dhe tani është përgjegjësia e tij e drejtëpërdrejtë për ta bërë këtë gjë.
Opozita nuk ka marrë asnjë privilegj, por ka garantuar standarde bazike që qytetarët të votojnë të lirë. Por opozita ka bërë një gjë që i ka hequr Ramës një 30 qershor të dytë, që të votojë dhe të numërojë vetë”, tha Vasili.
