Punonjësit e minierës së Balrit në Spaç, Mirditë, kanë përshkallëzuar protestën këtë të hënë duke bllokuar hyrjen kryesore të kompanisë.
Rreth 70 minatorë kanë ndalur punën në shenjë pakënaqësie ndaj kushteve të vështira të punës dhe nivelit të ulët të pagave.
Sipas punonjësve, protesta do të vazhdojë deri në plotësimin e kërkesave të tyre, të cilat përfshijnë përmirësimin e kushteve të sigurisë në minierë dhe rritjen e pagave mujore.
Ata paralajmërojnë se nuk do të largohen deri sa institucionet përkatëse dhe menaxhmenti i kompanisë të marrin masa për zgjidhjen e situatës.
Banorët dhe punonjësit e Spaçit shprehen me shqetësim për kushtet e punës dhe pasigurinë që ata përballen çdo ditë.
Një prej banorëve tha:
“I ruajt Zoti të gjithë djemtë e Spaçit. Zoti më vraftë, se atëherë futemi në galeri, bëjmë kryqin që të dalim gjallë prej aty prej pasigurisë. 20-30 mijë lekë janë duke i marrë edhe si kamarier. Këto thonë duhet performanca, në punë, të rrejnë me 2 mijë lekë. Ne jemi në vendin tonë, edhe themi medet, duhet me marrë rrobat dhe me ik nga vedni ynë.”
Një punëtor tjetër, i cili është themelues dhe organizator i kompanisë, deklaroi:
“Më kanë zhgënjyer me rrogat dhe me kushtet. Brenda ligjit dhe kushtetutës, ne duam kushte për punë, se s’jemi tu bo luftë me turqit, por duam drejtësi për vendin tonë të punës. Unë kam 35 vite këtu, punoj nëntokë.”
Një banor i tretë shtoi:
“Kemi dalë këtu për djersën tonë, për punën që na kanë mohuar këta. Pagat e ulëta, është turp me e ngju kush, marrim sa një pastrues. As maska nuk kemi dhe akoma po qëndrojmë këtu vetë për besën, se besa e mirë është e madhe shumë.”
Situata e krijuar në minierën e Balrit është një pasqyrë e vështirësive që përballen punonjësit e sektorit minerar në vend.
Banorët dhe punonjësit kërkojnë ndërhyrje të menjëhershme nga institucionet shtetërore dhe menaxhmenti i kompanisë, për të siguruar kushte më të mira pune dhe paga që reflektojnë punën e tyre.
