Nga Boldnews.al
Pritej shumë, por më shumë se qytetarët ai institucion po zhgënjen veten! Me dy çështje është marrë “fort” dhe po “lëkund nga themelet” të dyshuarit për korrupsion apo shpërdorim detyre.
Në një rast mezi priti përgjigjen e analizave të urinës së kryebashkiakut të Bulqizës Lefter Alla, ndërsa në rastin më të fundit po merret “seriozisht” me ish-kryebashkiakun e Hasit Adem Lala, për tentativën e privatizimit të një ndërtese.
Besojeni, po flasim për SPAK (Strukturën e Posaçme kundër Korrupsionit dhe Krimit të Organizuar), i cili në gjashtë muaj jetë, nuk ka marrë të pandehur qoftë edhe një zyrtar të vetëm të lartë shtetëror, të akuzuar për korrupsion.
Shifrat të rrëzojnë, kur ky institucion “elitë” i hetimit që nga 20 dhjetori 2019, kur zyrtarisht nisi punën, nuk ka asnjë të dhënë, asnjë shifër, asnjë dosje të qenësishme për çështjen e korrupsionit apo të shpërdorimit të detyrës të zyrtarëve të lartë publik.
Një mal me dosje është ajo e tërmetit të 26 nëntorit, ku në Durrës dhe Krujë zyrtarët e lartë të pushtetit lokal as nuk janë marrë në pyetje për ato ndërtime që i morën jetën 51 personave dhe mbi 1 miliardë euro dëme.
Në zyrat e tyre kanë edhe dosjet e koncesioneve në shëndetësi, por asnjë veprim konkret. Po ashtu ka nisur ti zërë pluhuri edhe denocimet e njëpasnjëshme për prishjen e Teatrit Kombëtar, por asnjë i pandehur, asnjë urdhër ndalimi. Asgjë!
Rilindja jo vetëm fle e qetë, por i gjithë pompimi i strukturës së SPAK doli një alarm fals… Ka dhjetëra denocime nga mediat dhe opozita me dokumenta, të cilat vërtetojnë skandale të mëdha finaciare dhe tendera të dyshimtë sidomos në kohë koronavirusi.
Por SPAK sa për të “prishur syrin e keq”, i ka dy dosje, fort qesharake, por për fatin e keq tregojnë edhe pamjen e drejtësisë së re. Njëra dosje lidhet me hetimet për kryebashkiakun e Bulqizës Lefter Alla, i cili shfaqet në një video duke thithur diçka në një pjatë… Ai nuk mohoi autencitetin, por tha se ishte i pastër dhe nuk kishte marrë kurrë kokainë.
SPAK pasi e mori në pyetje urdhëroi të kryheshin analizat e urinës së tij, që në fund “vërtetuan” se nuk kishte prani droge, gjithnjë pasi analizuan urinën e numrit një të Bashkisë Bulqizë.
Ndërsa dosja e dytë, që po e hetojnë me intesitet të “madh”, e madje mund ta bëjnë shembull është hetimi për ish-kryebashkiakun e Hasit Adem Lala, ndaj të cilit u hap procedim për tentativën e privatizimit të një godinë në atë qytet, që gjithsesi në fund nuk u privatizua.
Qytetarët prisnin që ky institucion i rëndësishëm në letra të vinte para përgjegjësisë, ministra, ish-ministra, zyrtarë të lartë publik e madje disa syresh shpresonin se kryeministri aktual apo paraardhësit e tij të jepnin llogari para drejtësisë. Pretendimet ishin të mëdha, por në gjysëm viti jetë po merret me çështje jo vetëm të vogla, por fort qesharake.
