Mirush Kabashi, aktori i madh i skenës shqiptare, ishte pjesë e një tryeze të thirrur nga shoqëria civile për reformëm zgjedhore.
Kabashi tha se deri tani është diskutuar se si t’i vjedhim votat ose si ti ruajmë nga armiku, domëthënë brenda familjes së politikës.
“Po kush e ka bërë, kush e ka futur këtë element në sistemin politik, kush e futi? Vetë partitë politike. Dhe e kanë perfeksionuar deri në këtë formë sa sot nuk po arrijmë dot t’ia gjejnë zgjidhjen”, tha Kabashi.
Kabashi shprehu pikëpamjet e tij për shoqërinë e demokracinë.
“Shoqëria shqiptare është si një anije e cila nuk ka busull dhe nuk ka një destinacion. Mos thotë njeri që kemi demokraci, ku ështe e shprehur?
Të njëjtët ministra apo nipat, mbesat, me të njëjtat vetura, me të njëjtët shoferë, do të drejtojnë të njëjtat ministri. Po si kështu, fitimtarët fitimtarë, e të mundurit të mundur në përjetësi? Ah jo! Në qoftë kështu mos ardhsh kurrë moj demokraci! Dhe më duket se drejt këtyre vargjeve, si profet më duket Bardhyl Londo, drejt këtyre ne po shkojmë nëse do të vazhdohet kështu. Do të formojmë edhe diktatorë të rinj”, është shprehur më tej ai.
Konkluzionin final e përcolli përmes vargjesh të një ish-të përndjekuri politik.
“Po me plagë dje,
Me plagë sot
Dhe nesër po përsëri me plagë
O vendi im, o Shqipëria ime
Cmë bëri kështu, sa zemra në gji po më plas
Se kërkoj njerin dhe njerëzit
Që me shpirt të flas
Flas me dru…flas me dru…”.
