Dy deputetë të asaj që njihet si “opozita e re”, Artur Roshi dhe Besnik Troplini, kanë deklaruar tërheqjen nga lista e 29 ligjvënësve që kërkojnë ndërhyrjen në Kushtetutë lidhur me koalicionet parazgjedhore.
Roshi dhe Troplini shprehen se kishin firmosur kërkesën për lista të hapura, por janë kundër ndërhyrjeve në Kushtetutë lidhur me ndalimin e koalicionee parazgjedhore dhe vendosjen e pragut elektoral prej 5 %.
“Ndërhyrja në Kushtetutë për hapjen e listave është një inisiativë e sinqertë e Opozitës Parlamentare, por që parashioh se do të ketë një përballje me pandershmërinë e pushtetit. Të premten 29 deputetë të Opozitës Parlamentare depozituan një kërkesë për ndërhyrjen në Kushtetutë në nenet 64 dhe 68 me qëllim hapjen e listave.
Anonçimi në media se do ndërhyhet në Kushtetutë për të ndaluar koalicionet parazgjedhore dhe vendosja e pragut 5% është shqetësuese sepse tregon se dikush është i interesuar. Këtë interes mund ta shfaqi ai që sheh se i afrohet mundësisë dhe fuqisë së kartonit për ta bërë këtë. Kjo lloj ndërhyrjeje, do të thotë ruajtjen e statukuosë, ruajtjen e sistemit bipolar politik që është sot,ruajtjen e sistemit të pengut nga kontrolli absolut i tregut politik. Pra Ajo që ndryshon është vetëm mënyra se si arrihen këto. Thënë më qartë,ndryshojnë formulën por ruajnë kapjen e sistemit që kanë sot”, theksojnë deputetët.
Në këtë mënyrë duket se grupi i deputetëve të “opozitës së re” lidhur me qëndrimin ndaj Reformës Zgjedhore po rrudhoset. Më parë edhe deputetë të tjerë kanë paralajmëruar se do të votojnë pro marrëveshjes së arritur nga Këshilli Politik lidhur me zgjedhoren, drafti i të cilës pritet të depozitohet të hënën në Kuvend.
“Opozita e re” kërkon listat e hapura për kandidatët, por edhe një ndërhyrje të Kushtetutë, për të ndaluar koalicionet parazgjedhore. Kjo kërkesë e tyre u konsiderua nga “opozita e bashkuar” si një lojë e Kryeministrit Edi Rama.
