Inspektori i Lartë i Drejtësisë njofton zyrtarisht se ka nisur verifikimet lidhur me dënimet e dhëna nga gjykatat shqiptare për shtetasin Hekuran Billa, i cili u ekzekutua mbrëmjen e djeshme në zonën e Komunës së Parisit në Tiranë.
“ILD ka ndjekur informacionet publike lidhur me vrasjen mbrëmjen e kaluar të shtetasit H.B., në zonën e Komunës së Parisit në Tiranë dhe të dhënat se ndaj këtij shtetasi ishte dhënë një dënim me burgim të përjetshëm.
Duke marrë shkas nga faktet e bëra publike në media ditën e sotme, zyra e Inspektorit të Lartë të Drejtësisë ka nisur verifikimin e këtyre fakteve dhe të rastit”, thuhet në njoftimin zyrtar.
Viktima Billa, 40 vjeç, kur ishte 26 vjeç, pra në vitin 2006, u akuzua dhe u dënua nga gjykata angleze për vrasjen e një 22-vjeçari, krim i ndodhur në Britaninë e Masdhe. Vendimi i drejtësisë angleze u njoh nga drejtësia shqiptare, dhe për pasojë, 40-vjeçari u ekstradua drejt Shqipërisë, në vitin 2014 për të vuajtur dënimin me burgim të përjetshëm.
Në Shqipëri Billa kërkoi një tjetër proces gjyqësor për njohjen e vendimit. Fillimisht ai u refuzua, por pas kërkesës së bërë në vitin 2017, gjykata ia konvertoi burgimin e përjetshëm me 25 vite burg, duke u bazuar në legjislacionin shqiptar, për veprat penale që akuzohej. Pasi mori këtë vendim 1 vit më pas Billa bëri sërish një kërkesë në gjykatë për t’u liruar me kusht.
Hekuran Billës i kishin mbetur edhe 5 vite burgim që ishte konvertuar nga gjykata me kusht. Billa kishte paraqitur në gjykatë një kontratë pune me një studio ku premtonte se do punonte si korrier dhe se do sillej mirë.
Vendimi për të rezulton se u ndryshua në datën 22 shkurt 2019, pasi Billa nga burgu pretendonte se kishte prindërit sëmurë dhe se ata nuk kishin të ardhura veç pensionit për të jetuar.
Vendimi
“Vendimi i huaj Nr.T.20087287 datë 14.10.2008 të Gjykatës së Kurorës Snaresbook, Angli, të dhënë ndaj shtetasit shqiptar Hekuran Billa, i datës. 14. 09.1980, lindur në Kukës dhe banues në Domje Tiranë, i dënuar për veprat penale “Vrasje”; “Vrasje” mbetur ne tentative dy herë ; si dhe “Plagosja me dashje për të shkaktuar lëndim të rëndë trupor”; vepra penale të cilat korrespondojnë me veprën penale “Vrasja në rrethana cilësuese”, e parashikuar nga neni 79/dh i K.Penal të Republikës së Shqipërisë.
Caktimin e dënimit me burgim të përjetshëm, për shtetasin shqiptar Hekuran Billa. Vuajtja e dënimit për të dënuarin Hekuran Billa, të fillojë më datë 15.11.2007. Kundër vendimit lejohet ankim brenda 10 ditësh nga e nesërmja e shpalljes në Gjykatën e Apelit Tiranë.
Kundër vendimit ka bëre ankim për të dënuarin Hekuran Billa, avokatet Ramiz Billa dhe Seit Zeqiri duke kërkuar nga gjykata lënien në fuqi të vendimit përsa i përket njohjes së vendimit penal të huaj Nr.T.20087287 datë 14.10.2008 të Gjykatës së Kurorës Snaresbook, Angli, të dhënë ndaj shtetasit shqiptar Hekuran Billa por duke i caktuar nje denim sa me te ulet.
Ne seancen gjyqësore të zhvilluar në Gjykatën e Apelit Tirane prokurorja Fatjona Memcaj kërkoi te vendoset mospranimi i ankimit pasi është bere nga persona te palegjitimuar”, thuhet në vendimin e marrë nga drejtësia shqiptare.
