Një ditë më parë, klubi i Tiranës bëri të ditur se kishte marrë urdhër nga Ministria e Shëndetësisë dhe Mbrojtjes Sociale për të kryere testimin për Covid-19 në të gjithë skuadrën.
Ndërkohë, diçka e tillë ka ndodhur ditën e sotme tillë dhe vetë lojtarët kanë publikuar foto para se të bënin tamponin. Një prej tyre është argjentinasi Agustin Torassa, i cili do të mungojë në ndeshjen e radhës me Luftëtarin. Në kampin bardheblu do të presin përgjigjet e testeve dhe shpresohet shumë që të mos ketë të infektuar, pasi kështu do të vihej në rrezik edhe vijimësia e kampionatit.
Te Tirana po kryejnë testet për shkak se te Bylisi doli pozitiv me COVID-19 Eridon Qardaku. Frika se mos ndonjë prej lojtarëve bardheblu është prekur ekziston tek autoritetet, që kanë vendosur t’u bëjnë tamponin të gjithë personave që ishin në takimin e luajtur në Ballsh të mërkurën, vendim që u kritikua nga FSHF-ja, pasi bie ndesh me protokollin e përcaktuar dhe firmosur nga vetë qeveria pa rinisur kampionati.