Me 85 vota pro Kuvendi ka miratuar ligjin për eurobondin, të cilin Presidenti Ilir Meta e ktheu për rishqyrtim.
Kreu i Kuvendit, Gramoz Ruçi, u shpreh se maxhoranca përgatiti amendamentet e propozuara nga Presidenti Meta, i cili ka dhënë edhe pëlqimin për hyrjen në fuqi menjëherë të ligjit.
“Në mbështetje të rezervave që Presidenti i Republikës kishte, i kam kërkuar komisionit të Ekonomisë për t’i shqyrtuar të gjitha sugjerimet që Presidenti kishte dhe siç ju njoftova në fillim të seancës të gjitha sugjerimet e bëra i ka kthyer në amendamente të cilat zyrtarisht është njoftuar Presidenti nëpërmjet një shkrese zyrtare nga kryetarja e komisionit dhe sapo ka mbërritur pëlqimi i Presidentit”, tha Ruçi.
Presidenti Meta nuk e ka dhënë pëlqimin për hyrjen e ligjit në fuqi menjehere, duke thënë se “Presidenti i Republikës së Shqipërisë, në zbatim të nenit 84, pika 4 e Kushtetutës, në mbrojtje të interesave publike që lidhen me financat e shtetit, si dhe për të mos lejuar që në kushtet e urgjencës të realizohen vendimmarrje të papërshtatshme për Shtetin shqiptar, ka vendosur të mos japë pëlqimin për hyrjen në fuqi menjëherë për këtë projektligj”.
Këtë muaj qeveria synon të dalë në tregjet ndërkombëtare për të kërkuar borxh në shumën 650 milionë euro. Huaja do të jetë një eurobond i ri i cili do te ketë një afat shlyerje nga 7 deri në 10 vite.
