Një aksident i rëndë rrugor ka ndodhur ditën e sotme në autostradën Tiranë–Durrës, pranë zonës së QTU-së, ku një autobus i linjës Tiranë–Berat ka dalë nga rruga dhe ka përfunduar në kanalin anësor.
Bilanci paraprak i ngjarjes është tragjik: 1 person ka humbur jetën, ndërsa 12 persona të tjerë kanë mbetur të plagosur, 7 prej tyre në gjendje të rëndë ndërsa mes tyre raportohet një fëmijë.
Sipas njoftimit zyrtar, ka humbur jetën drejtuesi i autobusit, R. H., 36 vjeç, banues në Kombinat, Tiranë.
Policia sqaron se një fëmijë, i cili mbërriti në një spital privat pa shenja jete dhe fillimisht u raportua si viktimë, u rikthye në jetë falë ndërhyrjes së ekipit mjekësor.
Më pas ai u transportua në Spitalin Ushtarak, ku ndodhet nën kujdes intensiv.
Nga të dhënat e grupit hetimor, pas humbjes së kontrollit nga drejtuesi i automjetit, mjeti është përplasur me bordurën, kur një prej bordurave metalike ka kaluar mes përmes autobusit.
Një nga arsyet e aksidentit, sipas informacioneve është humbja e kontrollit nga ana e drejtuesit të mjetit dhe dyshohet se mund të ketë pësuar atak kardiak gjatë drejtimit të automjetit.
Ndërkohë detaje ka dhënë edhe Drejtori i Policisë Rrugore. Sipas tij rreth orës 15:00 është marrë njoftimi për aksidentin, ku mjeti ka humbur kontrollin dhe është përplasur fillimisht me trafikndarësen, përpara se të dalë nga rruga.
“Paraprakisht dyshohet se mjeti ka humbur kontrollin,” u shpreh Perlat Vatoci, duke shtuar se furgoni ishte i licencuar për linjën Berat–Tiranë dhe anasjelltas dhe po udhëtonte në drejtim të kryeqytetit në momentin e aksidentit.
