Federata Shqiptare e Futbollit ende nuk ka marrë një vendim përfundimtar nëse sfida e vlefshme për javën e 17-të të Superiores, Bylis-Tirana do të luhet apo do të shtyhet pas daljes pozitiv me coronavirus të sulmuesit shkodran të ballshiotëve Eridon Qardaku.
Gjithsesi trajneri i Tiranës Emanuel Egbo ka bërë detyrën duke dalë në konferencë për shtyp para sfidës që është në program të mërkurën në orën 17:00. Trajneri i mrekullive te Tirana në këtë sezon, foli për situatën, për titullin kampion por edhe për koronavirusin.
Pritja për vendimin e FSHF-së- “Po presim vendimin e Federatës për ndeshjen e nesërme. I janë bërë teste të gjithë ekipit, më pas do të shikojmë si do të veprojmë. Kështu që presim deri në momentin e daljes së rezultateve. Edhe lojtarët do të kenë pak frikë, mund të jetë takuar me të gjithë, duhet kontroll që mos të përhapet. Këtë frikë kishim të gjithë: çfarë do të ndodhë nëse infektohet një lojtar”.
Titulli – “Do të shohim nesër se kush është 100% gati për të luajtur. Çdo ekip ka mendimet e veta. Nuk shikoj ekipet e tjera, ne shikojmë punën tonë. Lojtarët e dinë që janë edhe 30 pikë në lojë, ka 10 ndeshje. Zoti do të na udhëheqë, ne do të jemi mbrapa tij. Në momentin që do të sigurojmë matematikisht titullin, atëherë do të themi se Tirana ka dalë kampion. Për deri sa janë 30 pikë në lojë, do të luftojmë deri në fund. Çdo ndeshje për ne do të jetë si një finale. Ju kam thënë çunave dhe ata e dinë, duhet të jemi me këmbë në tokë”.
