Furtunë te Hetimi Tatimor, largohen nga puna 80 punonjës

Pas heqjes së masave me të cilat po përballej vendi ynë për shkak të pandemisë së Covid-19 dhe rikthimit në normalitet, 80 punonjës të Drejtorisë së Përgjithshme të Tatimeve kanë mbetur të papunë. Kjo ka ardhur si rezultat i riorganizimit të strukturimit të punës në Drejtorinë e Hetimit Tatimor.

Më parë kjo drejtori ka qenë e mbështetur në 4 rajone, atë të Shkodrës, Korçës, Fierit dhe Tiranës, ndërsa tani janë mbledhur në një të vetme, konkretisht vetëm në atë qendroren, Tiranë. Ky ristrukturim ishte vendosur që në datën 6 janar të këtij viti, vendim që nuk ka lidhje me situatën e krijuar në vend nga pandemia, ndërsa marrëdhëniet e tyre të punës punonjësit i kanë shkëputur vetëm më 22 prill.

LEXO EDHE  Tre rastet me Covid-19 në Pogradec, të prekurit shtetas gjermanë

Arsyeja e këtij ristrukturimi është bërë me qëllim të një pune më efikase në këtë Drejtori. Kujtojmë se lidhur me këtë vendim mund të ketë reagim edhe nga ana e të pushuarve nga puna të cilët mund ta hedhin në gjyq institucionin e tyre për ndërprerje të kontratave. /Fjala.al/