Këshilli Politik i Reformës Zgjedhore ra dakord sot për tre çështjet që ishin hedhur në tryezë për diskutim: periudhën zgjedhore, financimin e partive dhe kuotën gjinore.
Referuar propozimeve të opozitës, periudhat zgjedhore do të jenë 15 prill-15 maj dhe 15 tetor-15 nëntor, ndërsa më parë ishte një periudhë zgjedhore 3 mujore.
Oerd Bylykbashi, përfaqësuesi i PD-së, deklaroi se “sot diskutuam tre çështje. U arrit dakortësia që të jenë dy periudha zgjedhore: nga 15 prilli deri në 15 maj, periudha e parë dhe nga 15 tetori deri në 15 nëntor, periudha e dytë, që do t’i mundësojnë Presidentit datën e zgjedhjeve pa kufizime. Po ashtu, këto dy periudha i japin mundësinë zgjedhësve që të marrrin pjesë pa kufizime, duke pasur parasysh se shumë zgjedhës largohen nga Shqipëria në periudha sezonale apo kur i gjykojnë “të nxehta””.
Në vijim ai sqaroi se u arrit dakortësia në shumë elementë të financimit të partive politike, në lidhje me raportet, për një formulë mikse.
“Synimi ynë si opozitë ka qënë reduktimi në mënyrë drastike i financimeve private që të pastrohet politika dhe fushata nga interesa të paligjshme që penetrojnë në fushatë. Pati debat për çështje të ndryshme po jemi në përmbyllje të këtyre paketave”, tha Bylykbashi.
Ndërsa, përfaqësuesi i LSI, Petrit Vasili, duke folur për çështjen e tretë, kuotat gjinore, u shpreh se një nga tre argumentet që u përmbyllën në princip ishte ai i kuotës gjinore.
“Bashkëndamë një zgjidhje dhe një kompromis që kuota gjinore të respektohet me principin 1 me 3 dhe të unifikohet me kuotën gjinore të aplikuar në pushtetin lokal 50%, që ka qenë joefikase dhe jorealiste. Kemi kërkuar me forcë që të ketë dispozita mbrojtëse në realizimin e saj në praktikë për të evituar histori të së shkuarës dhe hedhur një hap në rrugën e duhur dhe tek demagogjia e radhës”, tha Vasili.
