I ftuar në “Mbremje në Abc” me Mirela Milorin, kreu i Vetëvendosjes në Tiranë, Bojken Abazi rrëfeu momentet e arrestimit të tij nga policia, gjatë protestës së 17 majit për prishjen e teatrit.
Abazi tha se ndonëse në shesh ishin të dhunshëm, në komisariat sjellja e policëve ishte ndryshe. Ai thotë se është arrestuar gjatë momentit kur ishte duke folur me megafon në protestë.
“Polici më tha mos më ke gjuajtur gjë më shishe, më tha ne të arrestuam nuk bërë gjë më vjen keq.
Në komisariat sjellja e tyre ka qenë korrekte. Me organizata nxorëm një komunikatë të përbashkët. Pasi shkruajtëm këtë komunikatë kanë ardhur disa qytetarët dhe më janë lutur merrni fjalën se nuk po flet askush.
Morëm fjalën dhe u bë një fjalim njëri pas tjetrit. Në momentin e dytë ishte duke ndodhur një skenë e rëndë, po prishnin teatrin eksperimental para syve tanë. Në atë moment sërish erdhën njerëz, dhe mora megafonin pyeta a jeni dakord që të rrimë, u kthyem nga policia dhe i kërkuam të lirojnë sheshin.
Ndalimi ka qenë me këto taktikat e zakonshme. Kur ti ndodhesh brenda kordonit dhe policia hap një kanal. Më kapën dhe më nxorën nga ana tjetër e kordonit. Një polici më gjuante me grushta në stomak për të trembur”, u shpreh Abazi.
Kreu i VV në Shqipëri tha po ashtu se gjatë aksionit për prishjen e Teatrit Kombëtar gjatë orëve të para të mëngjesit të 17 majit policia ka qenë e armatosur.
Një tjetër denoncim nga Abazi ishte se një protestuesi të teatrit i është çarë daullja e veshit nga dhuna policore.
Abazi tha se një gjë e tillë ka ndodhur gjatë protestës së 17 majit, kur u shemb godina e Teatrit Kombëtar. Kreu i VV nuk dha më shumë detaje, pasi shtoi se personi në fjalë do të dalë vetë për të bërë denoncim publik.
“Kam takuar një protestues që i kanë çarë daullen e veshit dhe mund ta humbë atë shqisë. E kanë liruar brenda ditës. Ai do flasë vetë. I kanë bërë edhe lojra te spitali mjeko-ligjor që nuk donin t’ja vërtetonin. Unë i kam të gjitha faktet me vete. Por ai do dalë vetë, e kam njohur në qeli. Ky djali që po ju flas është inxhinier”, u shpreh Abazi.
