Në një kohë që qytetarët protestonin dje për shembjen që iu bë godinës së Teatrit Kombëtar, duke i hapur rrugën ndërtimit të një godine të re, por nuk përjashtohet mundësia që në truallin pas tij, të ketë kulla, duket se Kryebashkiaku Erjon Veliaj nuk ndalet me betonizimin e Tiranës.
Paralelisht me protestën, pak kilometra nga bulevardi Dëshmorët e Kombit, një tjetër ndërtesë shembej për ti hapur rrugë një tjetër ndërtimi.
Video e mëposhtme tregon momentin e shembjes së një godine në rrugën e Kosovarëve, ku duket se do të ngrihet një tjetër pallat.
Veliaj është akuzuar se po betonizon Tiranën, edhe pse kur mori mandatin si kryebashkiak përbetohej se një gjë e tillë nuk do të ndodhte.
Por faktet flasin ndryshe, dhe Veliaj duket se po ecën më shpejt sesa mendohej. Pasi janë shembur banesa në zonat autoktone të Tiranës, që fare mirë mund të ruanin një historik, pasi shembi Teatrin, tashmë Bashkia duket se i është turrur çdo hapësire që mund të shërbejë si shesh ndërtimi.
