Avokati Ledio Braho tha se ashtu sikundër nuk lejohen tubimet për shkak të gjendjes së fatkeqësisë natyrore, ashtu edhe nuk duhet të procedohej me shembjen e Teatrit Kombëtar.
Në një intervistë në Oraneës, Braho tha se u përdor pandemia për shembjen e Teatrit dhe nga Qeveria ishte parashikuar që do të kishte reagime, pra tubime apo protesta.
“Fakti që në Shqipëri nuk ka Gjykatë Kushtetuese, nuk mund të kundërshton aktet e Qeverisë”, tha Braho.
Ai akuzoi policinë se ka qenë shumë e ethshme për të proceduar artistët dhe opozitën, ndërkohë që nuk ka asnjë hetim lidhur me forcën dhe dhunën e përdorur nga forcat e rendit, edhe pse ajo nuk ishte proporcionale.
“Nuk e di ende se sa persona janë ndaluar, por mendoj se nuk ka asnjë arsye që këta qytetarë të mbahen deri në 72 orë në komisariate, pasi prokuroria dhe gjykatat nuk po merren me asnjë çështje tjetër”, tha Braho.
Sipas tij, ministri i Brendshëm, sandër Lleshaj, ka bërë një reagim cinik lidhur me dhunën.
“Policia ishte pa numrat në uniformë që mos identifikoheshin, është shkelur edhe vetë ligji i Policisë së Shtetit”, tha Braho, referuar dhunës ndaj qytetarëve.
Braho tha se policia mund të kundërpërgjigjet ndaj qytetarëve vetëm në mënyrë proporcionale.
“Janë shoqëruar qytetarë që nuk kanë ushtruar dhunë. Kemi parë plot raste që kriminelëve iu vihen prangat me një etikë të madhe nga policia, ndërkohë që kur bëhet fjalë për qytetarë dhunohen”, tha Braho.
Lidhur me shembjen e Teatrit, Braho theksoi se në Gjykatën Kushtetuese janë dy ankesa nga Presidenti i Republikës, i pari për ligjin special dhe tjetëri për VKM e Qeverisë që kalon Teatrin nga Ministria e Kulturës te Bashkia e Tiranës.
