Kryeministri Edi Rama ka mohuar kategorikisht lajmin se në protestën kundër shembjes së Teatrit Kombëtar ka pasur policë të armatosur.
Në një intervistë për ‘News24’, teksa gazetarja Nisida Tufa pyeti kryeministrin në lidhje me një foto ku shiheshin disa policë me armë, ky i fundit theksoi se bëhej fjalë për një trupë policësh që dilnin nga ministria e Brendshme. Po ashtu ai theksoi se në godinën e Teatrit Kombëtar nuk ishte futur asnjë polic me armë.
“Kush është tejkalim i kompetencave të policit kur njerëz i hakërrehen dhe i futen në territor. Bilanci i kësaj dhune në fund të ditësh ishte fakti se 2 policë kanë përfunduar në spital. Nuk di që të ketë pasur artistë që ka përfunduar në spital.
Keni parë ju në ndonjë protestë jashtë kur të flitet për dhunë dhe në spital të shkojnë policët, ose më saktë vetëm ata. Aty nuk ka pasur dhunë policore. Keni parë policë me armë? Ku? Të armatosur ku? E rëndësishme është që të mos harroni një gjë se fakti që kërkoni qime në veze, flet për standardin demokratik.”, tha Rama.
Gazetarja: A janë armë këto zoti Rama?-pyeti gazetarja teksa i shfaqi kryeministrit pamjet e forcave speciale të armatosur.
Rama: Kjo është një trupë që po del dhe po ikën nga ministria e Brendshme. Këtu nuk shoh ndonjë marrëdhënie mes kësaj trupe dhe protestuesve. U tha se policia ka qenë e armatosur kur ka nxjerrë njerëzit nga godina. Policia nuk ka pasur asnjë pajisje kur ka hyrë për të nxjerrë njerëz.
