Mjeku infeksionist Pëllumb Pipero tha mbrëmjen e sotme në “Opinion” se Covid-19 i ka rënë virulenca.
Pipero tha se rreziku është më i ulët dhe hapja graduale mund të krijojë imunitet te popullsia.
Mjeku infeksionist tha se një hapje e kujdesshme tani na ndihmon shumë në krijimin e imunitetit dhe unë do të shpresoja shumë që 20 apo 30 % e qytetarëve të arrinin këtë gjë.
“Sot kishim 18 raste, por mendoj se virulenca ka rënë dhe këto janë raste kontaktesh të personave më të prekur. Situata mund të ishte shqetësuese sikur nga këto 18 raste, 5-6 të ishin shtruar në spital dhe njëri prej tyre të ishte rëndë”, tha Pipero.
Sipas tij, ecuria e epidemisë në Shqipëri ka qenë tërësisht e qetë dhe e butë epideminë.
“Mendoj se në zonat e kuqe duhet të aplikohen testet inteligjente, duke zgjedhur persona rastësorë të testohen, përmes grupeve rastësore. Ky është studimi i fundit amerikan”, tha Pipero.
Ai u shpreh se rastet e prekura nga koronavirusi në Shqipëri janë shumë më tepër sesa janë kapur apo identifikuar.
