Ministri i Rindërtimit, Arben Ahmetaj, i cili koordinon situatën e pandemisë, tha në emisionin Real Story, se më 21 maj del shifra e saktë e papunësisë nga pandemia për muajt mars-prill.
Ahmetaj tha se në këtë shifër nuk përfshihen bizneset e mbyllura, por theksoi se prilli ishte një ‘shok’ ekonomik për ekonominë shqiptare, pasi nëse në mars kishte 9 mijë të papunë nga pandemia, në prill do ketë më shumë.
Gjithsesi Ahmetaj thotë se Shqipëria për 2-3 muaj do të ketë një ringritje shumë të shpejtë sa i përket punësimit.
“Numri i saktë do të dalë më 21 maj gjithë papunësia e periudhës mars- prill. Kjo ka të bëjë me listapagesat dhe kontributet.
Do të shohim saktë çfarë kemi humbur. Nëse do i referohemi jo bizneseve të mbyllura, por për marsin papunësisë pra largimit nga listpagesat. Papunësia e shtuar ishte 9 mijë vetëm në mars. Prilli është më dominant.
Ishte kulmi, shok ekonomik që shkon nga kërkesa, se është goditur në themel kërkesa, qoftë me faktor të jashtëm dhe të brendshëm dhe këtu shihet prodhuesi duke përfshirë edhe turizmin, kërkesa e brendshme, konsumi apo reflektimi në uljë të importit. Në prill lëvizjet import- eksport janë më domethënëse. Saktësisht do jetë shifra më 21 maj”, tha Ahmetaj.
Sipas tij, shifrat operative tregojnë që dhe TVSH-ja e prillit është në një nivel me marsin.
“Edhe volumet nuk janë më aq të thella dhe mendoj që ekonomia shqiptare pa marrë për 1 sekondë faktorët ekzogjenë do ketë ringritje shumë më të shpejtë. Ky vit nuk do jetë me rritje plus por do ja dalë Shqipëria me simplicitetit të ekonomisë. Industritë bazike që ngrihen shumë shpejt. Pas 2-3 muajsh ku ringritja në punësim do jetë shumë e shpejtë”, tha Ahmetaj.
