Për të shtatën ditë radhazi, Rusia regjistroi sot më shumë se 10 000 raste të tjera me koronavirusin e ri duke e çuar numrin total të të prekurve në 200 000.
“Vendi numëron tashmë 198 676 raste të diagnostikuara, 10 817 prej të cilave të regjistruara në 24 orë”, sipas autoriteteve.
Rusia është vendi i pestë më i prekur për nga numri i të kontaminuarve, pas SHBA-së. Spanjës, Italisë dhe Britanisë së Madhe.
Me 1 827 të vdekur, 104 prej të cilëve në 24 orët e fundit, numri i viktimave mbetet më i ulët në raport me të gjitha këto vende dhe vendet e tjera Europiane si Franca, madje edhe Gjermania.
Autoritetet ruse konfirmuan se rritja e numrit të të infektuarve që prej një jave shpjegohet me faktin e rritjes së numrit të testimeve të kryera, 5,2 milionë, dhe jo nga përshpejtimi i përhapjes. Kjo shpjegon gjithashtu dhe numrin e ulët të vdekshmërisë.
Objektivi i depistimit masiv është për të gjurmuar rastet asimptomatike ose të lehta me COVID-19.
