Mbledhja mes përfaqësuesve të Federatës Shqiptare të Futbollit dhe Ministrisë së Shëndetësisë ka përfunduar. Vëmendja e diskutimeve është përqëndruar në strategjitë për lehtësimin e masave për aktivitetet sportive në përgjithësi.
Sekretari i përgjithshëm i FSHF, Ilir Shulku, në një prononcim për mediat është shprehur se ekspertët e Ministrisë së Shëndetësisë ishin shumë të kënaqur me protokollin që Federata i ka dërguar, teksa theksoi se shumë shpejt presin një përgjigje se kur do të rifillojë futbolli.
“Nga grupi i ekspertëve ishin shumë të kënaqur me protokollin që i kemi dërguar, e kanë parë me detaje, kanë dy tre pika të paqarta, për të cilat u diskutua në mbledhjen e sotme, por që do të diskutohen përsëri”.
“E përgjithshmja është pozitive, kështu që shpresojmë që shumë shpejt të na japin një përgjigje se kur do të rifillojmë”. – ka thënë Shulku.
Problemi kryesor është mungesa e tamponëve dhe nga ajo çka u tha, gjasat janë që të mos ketë testime për futbollistët. Shulku, mes të tjerash pohoi se klubet i plotësojnë kriteret dhe se u ngulmua në takim për rifillimin e përgatitjeve sa më shpejt.
Protokollet përfundimtare për të siguruar shëndetin e lojtarëve dhe të gjithë personave që përfshihen në aktivitetet sportive, do të hartohen nga grupi i përbashkët i ekspertëve që më pas do të miratohen nga Komiteti Teknik i Ekspertëve.
https://www.youtube.com/watch?time_continue=15&v=hDq7pDsdItM&feature=emb_title
