Mjeku imazherist i spitalit Infektiv, Renato Osmënaj, ka kërkuar një hetim për diplomat e recepsionistëve të 127-ës.
“Ne marrim te 127 dhe i themi kemi dhimbje gjoksi, nga ana tjetër na vjen përgjigjia pini paracetamol, dhe vdes nga infakti. Media duhet të investigojnë diplomat e recepsionistëve të Urgjencës Kombëtare, çfarë kanë mbaruar, kush janë”, tha Osmënaj, në emisionin Tempora, mbrëmmjen e së martës.
Imazheristi gjithashtu ka vënë theksin në debatin lidhur me rastet e shfaqjes së Covid-19 në Shqipëri.
“Është një debat që duhet bërë, bashkë me doktor Gëzim Xhepën, kemi publikuar imazhet pulmore të rasteve. Unë kërkoj ndjesë që nuk i kisha parë më parë, sikundër të gjithë duhet t´i kërkojmë ndjesë qytetarëve, përfshi edhe Qeverinë për atë mbyllje që iu bë në shtëpi”, tha Osmënaj.
Ai kërkoi gjithashtu një rikthim në rastet e janar-shkurtit, përfshi këtu edhe rasteve të vdekjeve.
“Duhet të jemi transparentë me qytetarët, ti themi të vërtetën, t´i qetësojmë. Më kanë marrë në telefon me qindra njerëz që më thonë se mund të kam kaluar Covid-19 në janar apo shkurt, më tregojnë shenjat që kanë pasur.
Se për fatin e keq ne nuk mund të bëjnë as testin e IGG, sepse edhe në QSUT nuk mund të bëhet për shkak se asaj pajisjes i mungon një kapak”, tha mjeku që me publikimin e imazheve pulmore ka çelur një debat, duke rrëzuar pretendimet zyrtare të Ministrisë së Shëndetësisë dhe ISHP-së, mbi kohën e shfaqjes së koronavirusit në Shqipëri.
Gjithashtu mjeku i njohur tha se dr. Silva Bino i ka premtuar një rishikim të të gjithë testeve dhe rasteve që janë bërë në janar dhe shkurt, ndërsa apeloi se me hapjen qytetarët duhet të kenë kujdes distancimin social dhe masat e tjera mbrojtëse.
“Kujdes duhet të kihet në fasoneri, reparte ushtarake, ose në vende ku mblidhen shumë njerëz, që janë të njëjtët dhe rrijnë për një kohë të gjatë, pasi problem kryesor është pikërisht masa e infektimit”, tha ai.
