Presidenti Ilir Meta iu drejtuar KLGJ-së me një kërkesë lidhur me mandatin e Ardian Dvoranit, anëtar i Gjykatës së Lartë dhe Kryetar i KED.
Meta në letrën e tij shprehet se Dvoranit i ka përfunduar mandati prej 6 vjetësh, ndërsa KLGJ lidhur me vendimin i është drejtuar ndërkombëtarëve që asistojnë drejtësinë.
E ndërsa Këshilli i Lartë Gjyqësor pritet të vendosë lidhur me mandatin e Dvoranit, në një njoftim për mediat nga Këshilli i Lartë Gjyqësor ai cilësohet si zv.Kryetar i Gjykatës së Lartë.
Këshilli i Lartë Gjyqësor njofton se sot është takuar së bashku me me anëtarët e Gjykatës së Lartë, me një përfaqësi të USAID.
“Në kuadër të nisjes së zbatimit të Marrëveshjes së Mirëkuptimit të nënshkruar rishtazi në mbështetje të Gjykatës së Lartë për përmirësimin e efikasitetit dhe uljen e numrit të çështjeve të prapambetura, u zhvillua të mërkurën një takim midis Gjykatës së Lartë, Këshillit të Lartë Gjyqësor dhe Projektit të USAID-it Drejtësi për të Gjithë. Kryetarja e Këshillit të Lartë Gjyqësor Znj. Naureda Llagami, Zv.Kryetari i Gjykatës së Lartë Z. Ardian Dvorani, si edhe anëtarët e kësaj gjykate, gjyqtarët Sokol Sadushi, Ilir Panda dhe Ervin Pupe, u takuan me Drejtoren e Projektit Znj. Anne Trice dhe Zv. Drejtoren e Projektit Znj. Olta Lolo, për të diskutuar rreth hapave konkretë për zbatimin e kësaj marrëveshje”, thuhet në njoftimin zyrtar.
