Tomor Alizoti ka reaguar ashpër ndaj Kryeministrit Edi Rama lidhur me deklarimet që bën përsa i takon situatës së krijuar nga epidemia e Covid-19.
Alizoti tha se Edi Rama po i çmend shqiptarët, po i degdis ato.
“Edi Rama shfaqet si një njeri që ka ikur në kozmos, i parruar, me një sjellje banale, skizofren, dhe thotë se unë jam Zoti dhe po ju shpëtoj”, tha Alizoti.
Në studion e Abcnews, Alizoti u shpreh se në Romën e lashtë kur u çmend Perandori nuk e vranë, por e morën dhe e degdisën diku, ndërsa Rama po na degdis dhe po na çmend ne me sjelljen e tij.
“Zgjidhja në demokraci nuk vjen nga lart, por nga zgjedhja. Zgjidhjet nuk vijnë nga “babai” sikundër shprehet Rama. Rama është efekti i shoqërisë, nuk është problemi”, tha Alizoti.
Sipas tij, Shqipëria nuk ka Gjykatë Kushtetuese, ka një parlament më banal se Kryeministri dhe ka një nen në Kodin Penal që të dënon deri në 15 vjet burg.
Alizoti tha se Rama është virolog, epidemiolog, madje edhe testet i nxjerr me vendime Qeverie.
“Na thotë se na shpëtoi ai, shfaqet si Mesia, ndërsa nuk bën teste”, tha ai.
