Drejtori i Urgjencës Kombëtare, Skënder Brataj, tha mbrëmjen e sotme se askush nuk i garanton qoftë pensionistët, qoftë gratë me fëmijë nën 10 vjeç, që nuk do të infektohen kur dalin.
Në emisionin Opinion, Brataj tha se si mjek nuk do të uronte që të gjendej përballë një situate të ngjashme si ajo në Itali.
“Nuk e kemi ekzagjiruar me koronavirusin, po të kishim 300 apo 400 të vdekur nuk do të flisnim sot për ashpërsinë e masave”, tha Brataj.
Ai tha se ka një rënie të fuqisë së virusit, por duhet të përdoren mjetet mbrojtëse.
“Gjermania po shkon drejt hapjes, por qytetarët porositen të mbajnë maska mbrojtëse. Çdo shtet po merr masat mbrojtëse, pasi virusi është prezent”, tha Brataj, duke shtuar se edhe në Shqipëri jemi në diskutim të masave që duhet të shoqërojnë hapjen.
I pyetur se cili është rreziku më i madh nga hapja, Brataj tha se nuk do të dëshironte të ishte në fazën e Italisë, që të zgjidhte mes pacientëve.
“Ne do të shikojmë rastet pas dy javësh, pra si është përhapur virusi dhe në përputhje me shifrat do të shohim strategjinë”, tha ai.
