Dita e djeshme rezultoi e tmerrshme për pushuesit në bregdetin e Durrësit, ku në disa raste është kërkuar ndërhyrja urgjente e ambulancës për shkak të përkeqësimit të gjendjes shëndetësore të qytetarëve.
Ngjarja më e rëndë ndodhi rreth mesditës në zonën e Sektorit Rinia, ku një burrë humbi jetën për shkak të vonesës së ambulancës, e cila mbërriti në vendngjarje mbi një orë pasi ishte njoftuar. Qytetarët e pranishëm tentuan t’i jepnin ndihmën e parë të ndjeri, por përpjekjet e tyre ishin të kota, pasi ambulanca mbërriti tepër vonë. Madje, sipas burimeve për redaksinë tonë, mjeti shëndetësor mbërriti pa staf mjekësor.
Por kjo nuk ishte e vetmja situatë alarmante. Në mbrëmje u raportua një tjetër rast i ngjashëm në Gjirin e Lalzit, ku një qytetare denoncoi vonesën e ambulancës pas përkeqësimit të gjendjes shëndetësore të babait të saj. Sipas saj, ambulanca mbërriti pas më shumë se 30 minutash dhe, si në rastin e mëparshëm, pa pajisjet e nevojshme për ndihmën e parë.
Ndërkohë që pushuesit përballen me situata të rrezikshme për jetën, ambulancat që administrohen nga Skënder Brataj duket se nuk përmbushin as standardet minimale për ndihmë emergjente. Ironikisht, ndërsa nuk është dhënë asnjë reagim zyrtar për këto ngjarje dramatike, vetë Brataj është shfaqur në rrjetet sociale duke shpërndarë video për rrezikun e peshkaqenëve në Egjipt, një sjellje që ka shkaktuar indinjatë në publik.
Një qytetar shkruan: “Njerëzit po vdesin në plazhet tona për shkak të vonesave të ambulancave, ndërsa Skënder Brataj shqetësohet për peshkaqenët në Egjipt./ JOQ
