Ish-ministri i Drejtësisë, Ylli Manjani, ka reaguar ashpër, pas dy ngjarjeve kriminale të ndodhura në Lezhë dhe Durrës, ku u ekzekutuan me armë zjarri 4 persona.
Manjani ironizon Kryeministrin Edi Rama dhe Presidentin Ilir Meta, të cilët i cilëson si “babai i Kombit” dhe “babai i Kushtetutës”.
Manjani shkruan se ndërkohë që vendi është ende i izoluar, sipas Kodit Penal të shefave të shtetit monist, s’duhet të lëvizë as miza, krimi vazhdon i lirë të shëtisë sipas qejfit.
Reagimi i ish-ministrit të Drejtësisë, erdhi pasi brenda pak orësh në dy ngjarje kriminale, mbetën të vrarë 4 persona, ndërsa autorët janë larguar.
Postimi i Manjanit
Brenda pak orëve u vranë 4 vetë. 2 në Lezhë e 2 në Durrës.
Ndërkohë vendi është ende i izoluar. Sipas Kodit Penal të shefave të shtetit monist, s’duhet të lëvizë as miza.
Po krimi vazhdon i lirë të shëtisë sipas qejfit.
2×2=jetë njerëzish!
As “babai i kombit” e as “babai i Kushtetutës” nuk i bënë dot derman..
Ah, harrova. “Babës së kombit” i rregullohet frymëmarrja në kësi rastesh…
