Kreu demokrat, Lulzim Basha, kundërshton projektin e Qeverisë lidhur me amnistinë fiskale, e cila sipas Kryeministrit Edi Rama pritet të miratohet në muajin maj nga Kuvendi.
Por Basha e konsideron amnistinë fiskale si një hapësirë për abuzim, ndërsa shtoi se ka edhe rrezikun që të kthejë fshehjen e parave të pista apo aktivitetin kriminal të fitimit të parave të pista, në një inkurajim.
“Amnistitë fiskale nuk bëhen kurrë pa një konsensus të gjerë shoqëror, pa një konsensus të madh midis faktorëve të ndryshëm të gjithë shoqërisë dhe duhen në kohë të qeta, në kohë stabiliteti.
Pse?! Për vetë natyrën e tyre, do të thotë që nëse 95% e qytetarëve punojnë në mënyrë të ndershme dhe 5% apo 10% kanë patur probleme me ligjin këta amnistohen. Por këtu ka edhe një rrezik, sepse amnistimi i një krimi, siç është fshehja e parave të pista apo aktiviteti kriminal i fitimit të parave të pista mundet pastaj ta kthejë këtë në një inkurajim apo akoma në keq, në shoqëri të prapambetura në një normë sepse “ti bëj çfarë të duash por një ditë shteti ty do të amnistojë”.
Pra, këtu kuptojmë që ka një risk, kërkohet një konsensus i gjerë, kërkohet një konsultim, kërkohet një diskutim.
Vendi ynë është në listën e vendeve për pastrimin e parave në Moneyval. Është viti i parë që Shqipëria rikthehet në nivelet më kritike të listës së pastrimit të parave të pista, ka po kështu nga SHBA, BE dhe DASH, dhe nga DASH, ka një sërë kërkesash për të vepruar kundër pastrimit të parave. Dhe kjo është diçka të cilën ne e kemi thënë prej kohësh sepse nisi me kanabisin, vazhdoi me drograt e forta dhe kalon me pastrimin e parave. Pra, Shqipëria e ka pastrimin e parave një problem shumë të madh”, tha Basha mbrëmjen e së premtes në emisionin Java në RTSh.
Për kreun demokrat, deklaratat se amnistia fiskale po bëhet për emigrantët është një abuzim.
“Në radhë të parë shumica e emigrantëve që rropaten nga mëngjesi deri në darkë nuk i mbajnë paratë poshtë jastëkut dhe nuk kanë atë sasi parash. Pas 6 vitesh emigrant në Francë do të kishte sjellë edhe Edi Rama ndonjë para si emigrant. Ne e dimë fare mire se në çfarë kushtesh punojnë emigrantët tanë.
Le të marrim ndonjë emigrant që paska mundësi të vënë para mënjanë. Në këtë situatë, ata e kanë të pamundur të udhëtojnë sepse janë të mbyllur kufijtë, por edhe sikur kufijtë të hapen ka rregulla në ato vende ku ata ndodhen i ndalojnë të nxjerrin mbi një sasi të caktuar nga vendi.
Pra, qartësisht emigrantët janë perdja pas së cilës fshihet qëllimi i vërtetë i këtij propozimi, që është favorizimi i klientelës kriminale të qeverisë”, tha Basha.
Në këtë kuadër, ai theksoi se amnistia që ka propozuar Rama nuk është gjë tjetër veçse një favor më shumë ndaj malavitës dhe ndaj një grushti njerëzish që duan të përfitojnë në këto kohë, që shpresojnë se BE apo institucione të tjera që mbikëqyrin Shqipërinë nga pastrimi i parave do ta kenë mendjen tek prioritete të tjera.
