Nga Elton Laska
Jemi në një situate pandemie ku shumica dërrmuese e Botës janë mbyllur brenda në shtëpi për t’ju shmangur sa më shumë infektimit nga Covid-19. Kjo ka sjell pasoja të mëdha në ekonominë të mbarë shteteve të Botës, por në Shqipëri kjo ndihet shumë më shumë. Sepse, edhe pa këtë situate pandemie situata ekonomike ishte shumë e brishtë.
Gjatë kësaj karantine kemi parë rëndomë Kryetar/e Bashkie të cilët me nga një qese në dorë perpiqen të bëjnë bamirësi duke ofruar kafshatën e munguar në derën e përzgjedhur me shumë kujdes.
Po të kthehemi në retrospektivë të gjithë ne kujtojmë “bezdisjet” me shiritat që priteshin dikur si rrjedhojë e investimeve, qofshin ato publike apo private. Aq shumë kishin rënë në sy këto shirita sa dikush doli me parullën “kujdes kur ndërton shtëpinë se të zënë derën me shirit”!!!
Sot “hero” është ai që të sjellë thesin e miellit tek dera e shtëpisë!
Ky domain dikur ishte kryesisht i OJF-ve ose personave që kishin mundësi dhe dhuronin për bamirësi diçka nga pasuria e tyre. Sot? Pushteti po bën gjithçka që t’i përjashtoje OJF-të, fondacionet, donatorët dhe po përpiqet me çdo kusht ta marrë flamurin në dorë dhe duket sikur po zëvëndëson shiritat me thesin e miellit.
Po e gjitha kjo ka një shpjegim, qeveria dhe qeveritarët janë kthyer në OJF për ti bërë vend propagandës. Ata po shmangin llogarillënien e gjendjes së shëndetësisë, të spitaleve në gjendje mizerabël, të parave që shkojnë për të mbushur xhepat e oligarkëve të PPP-ve, të klientëve të pamoralshëm që po shqyejnë si egërsira buxhetin e shqiptarëve me tendera të trukuar pa konkurencë dhe korruptiv.
Edi Rama po sillet si bamirës duke shfrytëzuar pandeminë të reduktojë edhe me të drejtat dhe liritë e qytetarëve të cilat edhe para pandemisë ishin gjysëm demokratike. Lideri suprem nxorri deri dhe blindat e ushtrisë për të mëkuar frikën, ndërsa vetë bën si shpëtimtar i këtij populli që ende përpëlitet për kafshatën e bukës.
A është kjo detyra e ushtruesve të pushtetit? A janë votuar ata për të na mbajtur shpirtin gjallë me kafshatën? A do të na “bezdisin” më me ndonjë inagurim investimi?!!! Apo ç’e deshe!
