Kundër-produktive i ka cilësuar eksperti i Shëndetit Publik, Erion Dasho, masat e Qeverisë, që lejoi të shtunën pensionistët dhe nënat me fëmijë të dielën, të dalin nga banesat, me një fashë orare që dyndi në rrugët e qyteteve këto kategori, duke mos respektuar as distancimin social.
Dasho tha se Qeveria nuk ka pse të shpikë masa, por të marrë shembujt që po aplikohen në Europë.
“Një nga masat që po aplikohet sot është ajo që pensionistëve i lejohet të dalin në oraret 07:00-08:00, e cila mund të aplikohet edhe në Shqipëri.
Gjithashtu mund të aplikohet që 4 ditë njerëzit të lejohen të shkojnë në punë dhe tre ditë të jenë në karantinë, kuptohet duke respektuar ato masat, e mbrojtjes dhe distancimit social”, tha Dasho në një lidhje me Abcnews.
Ai tha se e rëndësishme është vendosja nën kontroll e “R”, që është treguesi i infektimit.
“Covid 19,”R” e ka deri në 2.5, që do të thotë se një person i infektuar mund të infektojë deri në 2.5 persona. E rëndësishme është që ne “R” ta mbajmë nën kontroll, pra ky koeficient të jetë rreth 1, në mënyrë që sistemi mos bjerë në kolaps.
Këtë shpjegoi edhe edhe kancelarja Merkel, që do të thotë se me një koeficient 1 ne lejojmë atë që njihet si imuniteti i grupit.
Ne kemi 6 javë që kemi hyrë në epideminë e Covid-19, dhe kemi diku te 560 raste të konfirmuara dhe shumë pak vdekje.
Ky nivel transmetimi që kemi, nuk lejon krijimin e imunitetit të grupit, pasi do të na duhet të qëndrojmë edhe 6 muaj me këto ritme.
Deri në daljen e një vaksine, rruga e vetme mbetet imuniteti i grupit apo i tufës sikundër njihet. Duke izoluar njerëzit në shtëpi, virusin edhe mund t´a zhdukësh, por ne s´jemi ishull, që ta mbajmë në nivelin zero”, tha Dasho.
Sipas tij, në rastin e Shqipërisë, nuk dihet sa është koeficienti i shpërndarjes së virusit, por këtë duhet ta dimë në mënyrë që të përcaktojmë edhe masat për muajt e ardhshëm.
Dasho tha se nuk mund të flitet ende për hapjen e shkollave, pasi vërtet fëmijët preken më pak, ose shfaqin shenja të lehta, por ato mund të infektojnë prindërit dhe gjyshërit.
“Unë do të isha për mos hapjen e shkollave në këtë moment, përsa kohë nuk kemi një të dhënë shkencore mbi transmetimet. Por në rastin e shkollave duhet të kemi kujdes, kur fëmijët qëndrojnë 6 apo 7 orë në mjediset e mbyllura”, tha Dasho.
Ai tha se në Shqipëri duhet të adaptohen masat në përputhje me demografinë, kushtet, kulturën që kanë shqiptarët, në mënyrë që të jenë efikase.
