Ministrja e Shëndetësisë, Ogerta Manastirliu, deklaroi nga salla e Kuvendit se numri i të infektuarve me Covid-19 ka arritur në 518 raste, çka do të thotë se në 24 orët e fundit janë zbuluar plot 24 pacientë të rinj me koronavirus.
Manastirliu gjithashtu tha se janë kryer 800 testime te bluzat e bardha, dhe fatmirësisht ka rezultuar se 9 % e tyre kanë rezultuar me Covid 19.
Nëse shifrat e dhëna nga ministra Manastirliu janë të sakta, atëherë do të thotë se nga Covid 19 janë prekur 72 persona, pjesë e ekipeve mjekësore, shifër kjo e padeklaruar më parë zyrtarisht nga Ministria e Shëndetësisë, e cila raporton vetëm rastet e mjekëve të shëruar.
Por sipas Manastirliut më shumë se gjysma e epikeve mjekësore të prekura nga Covid 19 janë të shëruar.
“Në dy spitalet Covid në vend vetëm 14% e kapacitetit janë të zënë, kemi aktualisht 12 pacientë në terapi intensive dhe 4 në intubim. Nuk kemi asnjë mungesë në mjekim dhe logjistikë, ndërkohë që vazhdojmë punën me intensitet në terren”, tha ajo.
Manastirliu theksoi se lajm inkurajues është se numri i të shëruarve prej 5 ditësh e kalon atë të të infektuarit aktiv, shenjë e mirë, por kjo nuk është koha për bilanc se jemi në kushte të vështira dhe lufta nuk ka mbaruar.
“Në 40 ditë kemi sheshuar kurbën, kemi gjurmuar rastet dhe kemi trajtuar cdo rast, puna në terren nuk po ndalet”, tha ajo.
