Të tjera detaje janë zbuluar lidhur me atë se çfarë ka ndodhur në Elbasan, lidhur me rastet e Covid-19, ku duket se një restorant, i ndodhur përballë Gjykatës, ka funksionuar edhe pse kishte një Akt Normativ që ndalonte funksionimin e bareve, restoranteve, Pub-eve dhe një sërë biznesesh të tjera.
Deri më tani janë zbuluar disa pacientë me koronavirus që janë infektuar nga 46-vjeçari, pronari i restorantit,I cili ndodhet i shtruar në spitalin “Shefqet Ndroqi”, i kthyer në “Covid2”.
Restoranti ka funksinuar me qepena mbyllur deri një javë më parë, kur zyrtarisht u zbulua se ai ishte kthyer në një vatër infeksionesh.
Referuar të dhënave nga hetimi epidemiologjik, në total, nga kjo vatër janë infektuar 13 persona, bashkë me pronarin e restorantit dhe bashkëshorten e tij.
Por çfarë ka ndodhur?
Nga hetimet ka rezultuar se 46-vjeçari është trajtuar, pas shfaqjes së shenjave, nga e motra e tij, që është infermiere në qytetin e Elbasanit.
Skandali thellohet edhe më tej pasi nuk rezulton se qytetari nuk ka telefonuar në numrin e urgjencës 127, por përmes një automjeti privat ka shkuar në spitalin e Elbasanit, ku i është nënshtruar analizave të imazherisë.
Fatmirësisht mjekët që kanë kryer analizat kanë qenë me veshje mbrojtëse dhe skandali nuk ka përhapje te bluzat e bardha, edhe pse sikundër raportohet dy punonjës të sistemit shëndetësor spitalor në Elbasan, ndodhen të vetëkarantinuar, edhe pse testet kanë dalë negative.
Nuk dihet se si restoranti ka qëndruar i hapur në kushtet kur vendi ka qenë nën masa pothuajse shtetrrethimi, ku ndalohej qarkullimi, por nga raportimet mësohet se klientë të restorantit kanë qenë edhe gjyqtarë, prokurorë, avokatë dhe zyrtarë lokalë të Elbasanit.
Rasti në fjalë u zbulua pasi një kasap i qytetit që furnizonte me mish restorantin shfaqi shenjat e koronavirusit dhe hetimi epidemiologjik zbuloi skemën e infektimit të 12 personave të tjerë, pa përfshirë këtu pronarin e restorantit.
Ndërkohë pritet që hetimet të shtrihen në strukturat policore, që nuk kanë arriitur të identifikojnë funksionimin e një lokali, në kundërshtim me Aktet Normative të Qeverisë.
