Partia Demokratike e ka cilësuar një eksperiment të paprecedent humanitar dhe ligjor, atë që po ndodh ndaj shqiptarëve që trajtohen si robër lufte nga qeveria e tyre.
Arben Kashahu, Sekretar për Marrëdhëniet me Jashtë në PD, përmes një postimi në rrjet shprehet se kushtet çnjerëzore të qytetarëve tanë në kufi, të mbushin me revoltë njerëzore, kombëtare e ligjore.
“Pamjet e qytetarëve tanë të bllokuar në pikën kufitare të kapshticës, të lënë në kushte primitive, janë prova e sjelljes anti-njerëzore dhe anti-ligjore e qeverisë ndaj qytetarëve të saj.
Është eksperiment i rëndë humanitar, bllokimi i kufijve për shtetasit tanë nga qeveria duke i ekspozuar ato ndaj përballimit të kushteve të vështira ambjentale në një kohë shumë të gjatë, dhe rrezikuar jetën nga paushqyerja, të ftohtët, pa ndihmë mjekësore, si të ishin robër lufte. Edhe ndaj këtyre të fundit do të duhej të tregohej më shumë humanizëm sipas këndit tim.
Është një eksperiment i rëndë ligjor, sepse e drejta për t’u kthyer në vendin e tyre “The Right of Return” është e saksionuar në një numër të madh konventash ndërkombëtare ku Shqipëria është pjesë”, shkruan Kashahu.
Sipas tij, rasti i qytetarëve tanë të lejuar të kalojnë nga shtetet fqinje dhe të bllokuar nga qeveria e tyre është një nga precedentët që e drejta ndërkombëtare do të trajtojë e fiksojë në listën e shkeljeve brutale të kësaj të drejte nga një shtet si Shqipëria.
“Nuk po flasim këtu për mos-organizim misionesh ri-atdhësimi nga ana e qeverisë, por për t’i lejuar të drejtën Shqiptarëve të cilët kanë mbërritur në kufi me mundësitë e tyre, të hyjnë në tokën e tyre. Ky mohim, kondiderohet nga e drejta kombëtare dhe ndërkombëtare si krim!”, shkruan zyrtari i PD-së.
