Nga Boldnews.al
Disa urdhëra të Ministres së Shëndetësisë, Ogerta Manastirliu, për zgjatjen pa afat të kufizimeve drastike në kuadër të pandemisë “Cov-19” pas tre javësh karantinë kombëtare, zbuluan, në mënyrë indirekte se strategjia e kryeministrit Edi Rama për shumë propagandë dhe pak testime është e dështuar.
Pasditen e kësaj të Mërkure, Manastirliu vendosi të shtyjë pa afat periudhën e mbylljes së bizneseve të vogla, institucioneve arsimore, si edhe kufizimet mbi lëvizjen e qytetarëve, ndërkohë që kurba e personave të prekur nga virusi po rritet dita-ditës.
Në 11 Mars 2020, kryeministri Edi Rama njoftoi miratimin e Aktit Normativ nr.2/2020, të parin e një serie të tillë të ndërmarrë gjatë javëve të fundit.
Në ligjërimet nga dritarja virtuale, Rama deklaronte se qeveria e tij kishte marrë të gjitha masat dhe, deri në javën e tretë nga konstatimi i pacientit zero, do të vlerësohej situata dhe efikasiteti i distancimit të plotë social.
Sipas tij, distancimi mes njerëzve dhe mbyllja në shtëpi, pritej të ishin mjetet efikase për të përballuar një virus, për të cilin ende nuk ka një kurë.
Duke e pranuar që masat ishin ekstreme, sipas Ramës, ato i referoheshin rekomandimeve të Organizatës Botërore të Shëndetësisë.
Pas 3 javësh nga evidentimi i pacientit zero, deklarimet e kryeministrit Rama nuk u plotësuan. Kjo, pasi ai iu referua vetëm gjysmës së rekomandimeve të dhëna në mënyrë imediate nga Organizata Botërore e Shëndetësisë.
Organizimi ndërkombëtar u sugjeronte shteteve që të merrnin dy hapa; distancimin social dhe “testime, testime, testime”.
Sipas OBSH-së, nga njëra anë distancimi mes njerëzve dhe nga ana tjetër numri i lartë i testimeve, do të siguronte përballimin e pandemisë.
Por, kryeministri Rama nuk e ka reflektuar aspak sugjerimin “testim, testim, testim”. Shqipëria vijon të jetë një nga vendet me numrin më të ulët të testimeve të Cov-19 për numër popullsie, ndërkohë që kemi një normë mbi mesataren vdekshmërie, krahasuar me numrin e personave të identifikuar si të prekur.
Kryeministri Rama justifikohet se “Shqipëria ka mundësi të ulta financiare”, duke e krahasuar vendin me Shtetet e Bashkuara të Amerikës apo me Gjermaninë. Dhe, për këtë arsye, sipas tij, testimet do të kryhen vetëm tek “të dyshuarit realë”, për shkak të kostove financiare që kanë pajisjet mjekësore të nevojshme.
Ai i ka mëshuar fort masave për izolim thuajse total të qytetarëve, si mjetin e duhur për parandalimin e pandemisë. Por, siç konstatohet, ai e sheh zgjidhjen e krizës vetëm tek detyrimi i qytetarëve për të mos dalë nga shtëpia.
Ndërkohë, përgjegjësitë e tij qeveritare, sidomos në numrin e pakët të testimeve, e mbulon me fanfare propagandistike, përfshirë programin e përnatshëm “Alo Edi”, ku ai sillet se u zgjidh hallet qytetarëve nga zyra e tij.
