Viktima e 9 e shkaktuar nga Covid-19 në Shqipëri është një e moshuar nga Vlora. Ministria e Shëndetësisë njoftoi mbrëmjen e djeshme se ajo ishte 52 vjeç, por nga të dhënat e fundit mësohet se banuesja në fshatin Poro të Vlorës është një e moshuar rreth moshës 70 vjeç.
Mësohet se e moshuara ishte kthyer nga një udhëtim që kishte pasur në Itali, ku dyshohet se është infektuar.
E moshuara, që vuante nga hipertensioni, humbi jetën pas komplikacioneve që pësoi si pasojë e Covid 19.
Nga të dhënat mësohet se bashkëshorti i viktimës ka rezultuar negativ nga testi i kryer për Covid 19, por ai qëndron në banesën e tij i izoluar.
E moshuara jetonte në fshatin Poro prej 15 vitesh dhe mësohet se ajo ishte me origjinë nga Vlora.Edhe para pak ditësh Ministria e Shëndetësisë në një nga njoftimet e saj bëri të ditur për ndarjen nga jeta të një prej pacientëve të shtruar në Infektiv, por më pas rezultoi se pacienti ishte rikthyer në jetë dhe vijon të ndodhet nën terapi intensive.
Njoftimi i Ministrisë së Shëndetësisë
Mbrëmjen e së premtes ka ndërruar jetë në spitalin Infektiv një paciente 52-vjeçare nga Vlora, e konfirmuar me COVID-19.
52-vjeçarja ishte e shtruar prej katër ditësh në spitalin infektiv në QSUT, ndërsa dy ditët e fundit gjendja e saj ishte rënduar dhe po trajtohej në terapi intensive. Pavarësisht përpjekjeve të stafit mjekësor, pacientja që vuante nga hipertensioni, nuk arriti të mbijetojë.
52-vjeçarja është viktima e nëntë e prekur nga COVID-19 në Shqipëri.
Ministria e Shëndetësisë i shpreh ngushëllimet familjes së të ndjerit dhe apelon qytetarët të respektojnë me shumë rigorozitet rregullat e izolimit dhe distancimit social si dhe të telefonojnë urgjencën kombëtare në numrin 127 në rast se kanë shenja të sëmundjes.
