Veshi bluzën e bardhë dhe rifilloi punën tek Spitali Infektiv / Ja kush është prof. Kraja

Qeveria i drejtoi një thirrje mjekëve dhe infermierëve që kishin dalë në pension që ti bashkoheshin luftës ndaj Covid 19, që konsiderohet një armik i padukshëm.

Një prej mjekëve të vjetër, tashmë në pension, që iu përgjigj thirrjes është edhe Prof. Dhimitër Kraja, ish-Shef i Shërbimit të Sëmundjeve Infektive.

Ministrja e Shëndetësisë njoftoi se Prof. Kraja ka një jetë që shërben në spitalin Infektiv.

Dr. Luli, siç e thërrasin të gjithë dhe pas 48 vitesh punë, është përgjigjur i pari thirrjes për t’u kthyer në shërbim, për të ndihmuar stafin e palodhur të Infektivit në këto ditë të vështira.”

Një biografi e shkurtër

Prof. Dhimitër Kraja ishte në vitin 2015, shef i Shërbimit të Sëmundjeve Infektive në QSUT, pedagog i lëndës së Sëmundjeve Infektive në Fakultetin e Mjekësisë dhe koordinator i Shërbimit të Infektologjisë, Dermatologjisë dhe Sëmundjeve Profesionale të Fakultetit të Mjekësisë, UM Tiranë.

Në interesat profesionale vlerëson perfeksionimin dhe zhvillimin progresiv të infektologjisë Shqiptare. Ai është autor dhe bashkautor i 12 teksteve mjekësore, mbi 200 artikujve/posterave në tubime dhe përmbledhje abstraktesh në aktivitete shkencore botuar në revista ndërkombëtare si dhe mbi 200 punimeve në aktivitetet kombëtare.

Funksione të tjera ndër vite janë ai i Kryetarit të Urdhërit të Mjekëve të Tiranës, shefi i Klinikës II Infektive të Spitalit Infektiv, Tiranë, Shefi i Departamentit Infektologji – Dermatologji – Sëmundje Profesionale në Fakultetin e Mjekësisë. Prof. Kraja është anëtar i Shoqatës Shqiptare të Infektologjisë dhe disa shoqatave Ndërkombëtare të Infektologjisë dhe Hepatologjisë.

LEXO EDHE  Pse nuk duhet kërkuar shkarkimi i Ardi Veliut?

Prof. Dhimitër Kraja ka nisur punën si mjek klinicist në Spitalin Infektiv në vitin 1972. Ai është specializuar në Gastrohepatologji (1972- 1973) dhe në Epidemiologji dhe Sëmundje Infektive (1972-1974); Sëmundjet infektive, Tropikale, Mykotike, Parazitare dhe AIDS në Qendrën Spitalore Pitie- Salpetriere, (Paris 1988), Sëmundjet Seksualisht të Transmetueshme dhe Kolposkopi në Poliklinikën Universitare Umberto I (Romë 1995), Infektologji dhe AIDS në Institutin Kombëtar të Sëmundjeve Infektive L. Spallanzani, Romë.

Në një intervistë në vitin 2015, Prof. Kraja ka thënë: “E vlerësoj të qenit shef i shërbimit infektiv si një përgjegjësi të madhe pasi problematika infektologjike është e gjerë, polispecialistike dhe shpesh nuk ka kohë të presësh. Në të përfshihen edhe patologji të reja, të panjohura (infeksioni HIV/AIDS, infeksioni nga West Nile virus; gripi pandemik; sëmundjet e importuara nga zonat tropikale apo ato nga shkaktare multirezistente e të tjera). Me ndarjen e parakohshme nga jeta të dy personaliteteve të infektologjisë si Prof. K. Pano dhe K.Tavanxhi na u desh një punë e madhe dhe kolegjiale për të përballuar sfidat e shumta (akademike dhe klinike) me të cilat haset vazhdimisht specialiteti ynë. Ndoqëm taktikën e bashkëpunimit klinik dhe didaktik të stafit akademik dhe atij spitalor ordinator duke nxitur ndër të tjera edhe ngritjen e nivelit teorik/shkencor të kolegeve ordinatorë dhe lehtësimin e ngarkesës së pedagogëve.”