Prej orës 13:00 të ditës së sotme, e shtunë, deri të hënën në orën 05.00, në Shqipëri nuk lejohet qarkullimi, qoftë për këmbësorët ashtu edhe për automjetet.
Të vetmit që mund të qarkullojnë janë mjekët dhe stafet mjekësore, policia, ushtria, por edhe ata që zotërojnë një leje të posaçme.
Masat që kufizojnë në ekstrem lëvizjen dhe që ashpërsohen më shumë javën tjetër synojnë të parandalojnë sa më shumë përhapjen e COVID-19, i cili ka shkaktuar në Shqipëri 10 viktima.
Kryeministri Edi Rama njoftoi dje se nga e hëna askush nuk do mundet të dalë më për pazar pa marrë leje. E kjo do jepet për vetëm një person të familjes.
Proceduren e shpjegoi dje Drejtorja e AKSH-it:
“Në portalin e-albania, ky autorizim do të jetë i pari dhe quhet thjesht ‘leje për dalje’. Më pas shfaqet shërbimi, kliko përdor dhe ne kemi bërë të mundur përzgjedhjen e ditës se kur e duam lejen e daljes.
Po zgjedh 30 marsin. Klikojmë vazhdo dhe më mundësohet çertifikata ime familjare ku vetëm një prej pjesëtarëve të familjes mund të aplikojë për leje që do të ketë orën dhe kohëzgjatjen vetëm një orë.
Zgjedh një orar nga ora pesë deri në një, përcaktoj ose jo numrin tim të telefonit. Më pas leja do të shkojë me email në acoountin e portalit e-albania më pas do të vijë një sms nëse keni lënë edhe numrin e telefonit.
Duke zgjedhur dërgo kam mundësi të finalizoj autorizimin dhe më pas të vjen një sms”.
