Bordi i Barcelonës u mblodh ditën e sotme për të gjetur një rrugëzgjidhje mbi reduktimin e impaktit negativ që ka pasur coronavirusi në klub.
Sipas “La Vanguardia”, bordi i klubit i ka kërkuar anëtarëve të skuadrës të drejtuar nga Quique Setien për të gjeneruar para brenda klubit për të mbuluar disa nga shpenzimet në rritje.
Kjo ndihmë financiare nga lojtarët e klubit, pritet të vijë në formën e shkurtimit të pagesave për çdo futbollist, i njëjti plan siç po planifikohet edhe për Serinë A.
Të ardhurat kryesore, Barcelona i ka nga La Liga dhe Liga e Kampioneve. Duke qenë se të dyja janë të pezulluara dhe e ardhmja është e paqartë, klubi i Barcelonës ashtu si dhe skuadrat e tjera të mëdha evropiane po përballen me humbje financiare, të cilat do të ishin fatale nëse kompeticionet nuk rinisin.
61% i buxhetit total për sezonin 2019/2020 është planifikuar për pagesat. 507 milionë euro janë në dispozicion për rrogat e lojtarëve, 135 milionë për pagesat e borxheve, ndërsa 61 milionë euro janë shpenzuar në merkaton e transferimeve.
