Pasi Kryeministri Edi Rama njoftoi angazhimin e policisë dhe forcave të ushtrisë në ruajtjen e distancave mes qytetarëve në markete dhe farmaci, apo zyra të tjera ku merren shërbimet nga qytetarët, ministrja e Mbrojtjes, Olta Xhaçka, ka angazhuar forcat e Policisë Ushtarake, krahas atyre të Policisë së Shtetit, në këtë operacion.
Përmes një reagimi në rrjetet sociale, Olta Xhaçka shprehet se çdo supermarket dhe bankë në fashat e orareve 6.00 – 10.00 dhe 16.00 – 18.00 do të gjeni efektivë të Forcave të Armatosura dhe të Policisë së Shtetit.
“Këta djem që shikoni në foto kanë lënë në shtëpi familjet e tyre e po bëjnë të pamundurën për t’ju mbrojtur në mënyrën më të mirë që ata dinë: DISIPLINIMIN”, teksa shton edhe rregullat që duhen zbatuar nga qytetarët”, shprehet Xhaçka.
Reagimi i plotë:
🟢Në çdo supermarket dhe bankë në fashat e orareve 6.00 – 10.00 dhe 16.00 – 18.00 do të gjeni efektivë të Forcave të Armatosura dhe të Policisë së Shtetit për të mundësuar të gjithë bashkë, ju dhe ne, zbatimin E PADISKUTUESHËM të rregullave të vendosura për këto ditë të vështira.
🟢Këta djem që shikoni në foto kanë lënë në shtëpi familjet e tyre e po bëjnë të pamundurën për t’ju mbrojtur në mënyrën më të mirë që ata dinë: DISIPLINIMIN.
🔴Ndiqni këshillat e specialistëve
🔴Respektoni oraret
🔴Mbani rradhën në supermarkete e banka
🔴Ruani distancën 2 metër nga njëri – tjetri
🔴Respektoni masat mbrojtëse në ambjentet publike
🔴Qëndroni në shtëpi me familjet tuaja
🇦🇱Mirënjohje çdo efektivi të FA e Policisë së Shtetit në krye të detyrës
