Komisioni Qendror i Zgjedhjeve rrëzoi kërkesën për zhvillimin e një referendumi për të ndryshuar sistemin zgjedhor dhe për listat e hapura. Kundër nismës së paraqitur në KQZ votuan Denar Biba, Edlira Jorgaqi, Bledar Skënderi.
Ndërsa pro saj, Rezarta Bitri dhe kryetari i KQZ, Klement Zguri.
Nisma u paraqit në KQZ nga një grup aktivistësh e qytetarësh. Përmes një kërkese zyrtare, bazuar në Kushtetutë, ata propozojnë që pyetja e referendumit të jetë:
“A je dakort që të ndryshohet sistemi zgjedhor për të barazuar fuqinë e votës dhe për t`iu krijuar më shumë mundësi të zgjidhni, me votën tuaj, përfaqësuesit në Kuvendin e Shqipërisë dhe në këshillat bashkiake?”
Sipas tyre, realizimi i këtij referendumi do të jetë një hap i madh përpara dhe ndryshim i thellë në menyrën se si është konceptuar dhe realizuar deri sot ushtrimi i sovranitetit dhe demokracia perfaqësuese në vendin tonë.
Firmëtarët e kësaj nisme janë: Kristaq Kume, Brizida Gjikondi, Silvana Bello, Lavdosh Ferruni, Andi Tepelena, Elvis Hoxha, Enis Sulstarova, Evrikli Kolovani, Kreshnik Merxhani, Kledia Abbas
Liridona Hoxha, Kiara Muka
Debatet
Denar Biba: Jemi përballë një kërkesë të re. I mungon arsyetimi. Pyetja është specifikuar krahasuar me të parën, por referendumet nuk bëhen për te shuar kureshtjen. Kushtojnë po aq sa një palë zgjedhjet. Kërkesa e re nuk respekton ligjin
Bledar Skënderi: Pyetja është e paqartë. Lë vend për interpretime dhe nuk i vendos zgjedhësit perballë një kërkese të qartë
Rezerta Bitri, PS: Nuk kemi pse ju refuzojmë formularët tip për të mbledhur 50 mijë firma. Të mos jua refuzojmë të drejtën për të mbledhur nënshkrime
Klement Zguri, kryetar i KQZ: Sovraniteti i takon popullit? Kjo është një fasadë. Ligjvënësi prej vitesh nuk sjell ligjin për referendumet. Legjislacioni në fuqi pengon qytetarët të shprehen drejtpërdrejt.
Kristaq Kume, nismëtar: Po e rrotulloni gjuhën siç ju intereson. E dini që në fillim se çfarë do bënit.
Denar Biba eshte shprehur se nuk ka vendimmarrje, pasi nuk ka kourumin e nevojshem prej 4 votash.
