Numri i viktimave në Itali, shkaktuar nga koronavirusi i quajtur COVID 19, ka arritur në 148, ndërsa numri i të infektuarve në 3858 persona, nga të cilët 414 janë shëruar.
Një studim hedh dritë mbi vdekshmërinë, moshën mesatare dhe sëmundjet e pacientëve që humbën jetën.
Instituti i Lartë i Shëndetësisë në Itali, përmes një studimi, bën të ditur se mosha mesatare e personave që kanë humbur jetën nga koronavirusi në Itali i përkasin moshës 81 vjeç, dhe më shumë se gjysma e viktimave kanë vuajtur nga 2 ose 3 sëmundje të tjera.
Sipas raportit, në studim janë marrë 73 persona që humbën jetën në Lombardi, 21 në Emilia Romagna, 7 në Veneto dhe 3 në rajonin e Marche dhe bazohet në të dhënat e nxjerra duke plotësuar një pyetësor të zhvilluar posaçërisht me qëllim zbulimin e rasteve të vdekjes.
Mosha mesatare e viktimave është 81 vjeç, rreth 20 vjet më e lartë se mosha mesatare e pacientëve burra që preken nga virusi, dhe 28 vjet me e lartë se e grave.
42,2 për qind e vdekjeve i përkasin grupmoshave midis 80 dhe 89 vjeç, ndërsa 32.4 për qind ishin midis 70 dhe 79, 8.4 për qind midis 60 dhe 69, 2.8 për qind midis 50 dhe 59 dhe 14.1 për qind mbi 90 vjeç.
Gratë që kanë vdekur nga virusi janë në moshë më të madhe se burrat. Gratë me moshë mesatare 83.4, ndërsa burra me moshë mesatare 79.9 vjeç.
Numri mesatar i patologjive të vërejtura në këtë popullatë është 3.4. Në përgjithësi, 15.5% e mostrës kishin 0 ose 1 patologji, 18.3% kishin 2 patologji dhe 67.2% vuanin nga 3 ose më shumë patologji.
Semundjet më tipike janë hipertensioni (i pranishëm në 74.6% të viktimave), i ndjekur nga sëmundja ishemike e zemrës (70.4%) dhe diabeti (33.8%).
Koha mesatare nga fillimi i simptomave deri në shtrimin në spital ishte 5 ditë.
