Rama flet për amnisti fiskale, Kryeprokurori: Do hetojmë informalitetin

Prokurori i Përgjithshëm, Olsian Çela, ka folur për një situatë emergjence në organin e akuzës, duke e lidhur këtë me faktin se edhe në vitin e 4-rt të reformës në drejtësi “ende nuk ka një perspektivë të qartë se kur sistemi do të funksionojë me kapacitete të plota”.

Ai ka paralajmëruar hetimet ndaj informalitetit, duke theksuar se ai e ka gërryer sistemin ekonomik e social prej 30 vitesh.

“Ne do të propozojmë sot ndërmarrjen e disa hapave konkretë për përmirësimin e kapaciteteve tona në hetimet që lidhen me pastrimin e produkteve të veprës penale dhe krimin financiar, duke synuar krijimin e një ambienti mbytës ndaj gangrenës së informalitetit që ka gërryer për 30 vjet sistemin ekonomik në vend dhe është kthyer në pengesë për zhvillimin e qëndrueshëm social-ekonomik.

Përtej këtyre, ne do të synojmë të vëmë në lëvizje një projekt për një qasje të re të institucioneve tona në raport me mënyrën e hartimit të politikave penale, përmes një këndvështrimi shkencor që bazohet mbi studime të mirëfillta kriminologjike, ku organet ligjvënëse, ato ligjzbatuese dhe bota akademike bashkëveprojnë për krijimin e modeleve realiste mbi instrumentet dhe mënyrat se si shoqëria jonë duhet të përballet me fenomenet kriminale”, tha Çela.

Deklaratat e kryeprokurorit në këtë drejtim vijnë në një kohë kur Kryeministri Edi Rama ka paralajmëruar miratimin e një amnistie fiskale, ndërsa i ka drejtuar apel emigrantëve dhe biznesmenëve që të përfitojnë nga koha që kjo amnisti do të veprojë. Gjithashtu Rama ka deklaruar se shumë nga asetet janë në emra të tjerë, pra jo të pronarëve të vërtetë.

LEXO EDHE  Kush do të jetë kryenegaciatori me Serbinë? Avdullah Hoti e tregon pa dilema

“Ndërkohë që reforma në drejtësi ka sjellë ndryshime rrënjësore nga pikëpamja strukturore në ngrehinën e drejtësisë, suksesi i shumëpritur do të mbetej i skicuar vetëm në imagjinatën e krijuesve dhe promovuesve të saj nëse njerëzit që do të mbeteshin apo do të hynin brenda kësaj ngrehine do të vazhdonin të gëlonin në moçalin e apatisë dhe mediokritetit, duke pritur që ndryshimet të vinin sërish nga një botë tjetër, e huaj dhe e pakuptueshme për ta, por që kishte zgjidhjet magjike dhe për problemet më të thjeshta për të cilat mjafton vetëm forca e vullnetit të mirë për t’u dhënë zgjidhje.

Reforma në drejtësi është ende në proces, pasi ndërkohë që është miratuar një infrastrukturë e tërë ligjore për funksionimin e sistemit të drejtësisë, institucionet e reja janë ngritur vetëm pjesërisht. Edhe pse procesi i vetingut nuk ka arritur ende në mesin e rrugëtimit të tij nga pikëpamja sasiore, organet e drejtësisë po ballafaqohen me mungesa të theksuara në burime njerëzore për shkak të largimeve të magjistratëve nga procesi i rivlerësimit kalimtar.

Prokuroria është organi që ka pësuar ndryshimet më drastike nga reforma”, tha Çela.