“Nuk do të ketë asnjë tolerancë të mundshme nga ana e shtetit lidhur me pasuritë dhe paratë e krimit”. Kështu deklaroi Kryeministri Edi Rama gjatë seancës parlamentare, duke folur për amnistinë fiskale, duke ftuar biznesmenët që kanë të ardhura të konsiderueshme që të përfitojnë nga ky proces.
“OFL ndan me thikë “paranë e krimit” nga paraja e fituar në mënyrë të ndershme. Askush mos bëjë shaka, pasi shteti do të hyjë në një fazë të re.
Do të kërkojmë informacione mbi pasuritë që kanë shqiptarët jashtë vendit. Shumë asete nuk janë në emrat e vërtetë, ndaj kush kërkon të përfitojë nga amnistia do të ketë një kohë të kufizuar, pasi në të kundërt do t’i nënshtrohen ligjit njëlloj si paratë dhe pasuritë e vendosura nga krimi”, tha Rama.
Sipas tij, tani po shihet se si po shkërmoqet oligarkia e gjyqtarëve dhe prokurorëve, por të jeni të sigurtë se ata s’kanë gjë akoma.
“Amnistia fiskale dhe penale që shpresoj të ketë mbështetjen e plotë të Kuvendit është domosdoshmëri për t’ju dhënë shqiptarëve që prej 30 vjetësh kanë punuar dhe jetuar ndershmërisht në emigracion apo në vend, mundësinë që të formalizojnë të ardhurat e tyre nga puna duke formalizuar duke deklaruar ato që nuk i kanë deklaruar dhe duke i futur paratë e tyre në bankat e vendit. Ashtu sikur formalizimin e aseteve të tyre, dimë që ka asete të paformalizuara ose që nuk janë në emrin e të vërtetëve, të vërtetët do të kenë mundësi të shfaqen dhe të formalizojnë asetet, nëse nuk duan që pas amnistisë të jenë objekt i ligjit për asetet kriminale”, tha Rama.
Në vijim ai shtoi se nuk është e mundur më që vendi të mbajë në kurriz peshën 30 vjeçare të pasurive kriminale.
“Institucionet e reja të drejtësisë, SPAK është vënë në lëvizje dhe po provon se janë në drejtimin e duhur. Dosjet për sekuestrim po trajtohen nga SPAK, askush nuk do të shpëtojë nga rrjeta e OFL për asetet e vëna me krim, por natyrshëm kjo ka krijuar pasiguri që s’ka bazë se OFL nuk ka subjekt askënd tjetër veç atyre që kanë kryer krime, por duke e ditur ata që janë shqetësuar se kanë para të fituara nga puna në të zezë, dhe asete të padeklaruar janë vënë në pasiguri”, tha Rama.
