Manifestimi i 2 marsit/ Rama për Metën: Presidenti ka më shumë se 1 shtëpi

Kryeministri Edi Rama ka shmangur komentet lidhur me manifestimin e thirrur nga Presidenti Ilir Meta më 2 mars me moton “për mbrojtjen e Kushtetutës”.

Rama gjithashtu ka shmangur edhe mocionin e disa ish-figurave të PS-së, që i janë drejtuar Kongresit të socialistëve me një platformë, që sipas tyre, synon reformimin e PS-së. E ndërsa për firmëtarët e mocionit, Rama tha se “socialistët e kanë një shtëpi, lidhur me manifestimin e 2 marsit, Kryeministri u shpreh se Presidenti ka më shumë se 1 shtëpi.

“Presidenti e ka shtëpinë, më shumë se një shtëpi. Unë jam këtu për shtëpitë e atyre që jetojnë në çadra, apo shtëpitë e të tjerëve me qira dhe presin të kthehen në shtëpitë e tyre. Për ata jam unë këtu, jo thjesht në këtë konferencë por në të gjitha orët e ditës sime me gjithë natën. Ua kam lënë juve çështjen e presidentit, unë nuk merrem me presidentin. Është shumë luks i madh për mua”, tha Rama.

LEXO EDHE  Mbi 250 mijë të shëruar nga COVID-19 në mbarë botën

Deklaratën Rama e bëri gjatë konferencës për prezantimin e projekteve për rindërtimin pas tërmetit.

Në një konferencë ku po prezantohen projektet dhe modelet e rindërtimit për familjet e prekura nga tërmeti i 26 nëntorit, Rama deklaroi se procesi në fjalë do të nisë nga familjet më të prekura dhe me më pak të ardhura.

“Ata kanë më shumë se të tjerët domosdoshmërinë për të hyrë në një shtëpi të re. Synohet që brenda këtij viti të kemi sistemuar disa mijëra familje. Shtëpitë e para do të jenë për familjet në çadra që nuk duan të shkëputen nga tokat e tyre”, deklaroi Rama.