Ardian Dvorani, kreu i KED-së u paraqit para Komisionit Hetimor parlamentar i ngritur për shkarkimin e Ilir Metës nga posti i Presidentit të Republikës.
Dvorani ka dhënë shpjegime mbi veprimtarinë e KED-së për plotësimin e vendeve vakante në Gjykatën Kushtetuese.
I kallzuar penalisht nga Presidenti Meta në SPAK si një nga zyrtarët që është përfshirë në atë që Kreu i Shtetit, e quan “grusht shteti” për kapjen e Gjykatës Kushtetuese, Dvorani tha se gjatë 2019 janë krijuar vendet vakante në Gjykatën Kushtetuese, por ka pasur probleme lidhur me kandidaturat.
Dvorani tha se akuzat që i bëhen janë me karakter politik, duke shtuar se ai si gjyqtar që ishte ishte i detyruar të vetëpërmbahej, por jo se nuk ishte në gjendje të kthente përgjigje.
“Një pjesë e kandidatëve janë tërhequr nga kandidimi, disa u skualifikuan nga ana jonë për shkak të kritereve profesionale, dhe përfunduam në shifrën e 6 kandidatëve për 4 vende vakante në Kushtetuese”, tha Dvorani.
Sipas tij, kushtet e kandidimit janë të hollësishme dhe rigoroze, dhe u kualifikuan vetëm ata që sipas vlerësimit të KED-së, plotësonin kriteret.
Dvorani ka pohuar se nuk është marrë një vendim lidhur me kandidatët që u përcollën për vendet vakante në Gjykatën Kushtetuese, por vendimi është dërguar prej tij.
“Listat i dërgova unë, nuk është marrë vendim. Rradha e dërgimit të listave është në ligj”, tha kreu i KED-së.
Sipas tij, Kushtetuta përcakton se 3 anëtarë të Kushtetueses i zgjedh Presidenti, 3 Parlamenti dhe 3 Gjykata e Lartë.
“Kushtetuta parashikon që KED bën renditjen e kandidatëve dhe ua dërgon institucioneve. Kushtetuta nuk mund të lexohet si roman, por interpretohet dhe ka teknikat e veta”, tha Dvorani.
I pyetur sepse dërgoi në Presidencë listën me 4 kandidatë për 1 vend vakant, ndërkohë që mund të çonte 3 emrat e parë, Dvorani tha se kjo është bërë në emër të transparencës.
“Ne çuam listën e plotë me renditjen e kandidatëve, pasi menduam se kjo ishte transparente”, tha Dvorani.
