Deputeti socialist Spartak Braho shprehu sot rezerva të forta lidhur me Operacionin Forca e Ligjit, duke theksuar se policia s’mund të jetë mbreti i veprimeve që merren.
Pavarësisht se ka miratuar aktin normativ dhe ndryshimet respektive, Braho tha se sekuestrimet e pronave, përfshi edhe automjeteve, s’mund të bëhen nga policia, por duhen vendime Gjykate.
“Mbi ç’bazë janë sekuestruar makinat në komisariate, pasi ne si Kuvend nuk i kemi nxjerrë ende aktet nënligjore. Të bëjmë shumë kujdes ndaj pronës private.
Prona është shumë e shenjtë, është gjykata që do vendosë nëse veprimet janë të sakta apo jo.
3 muaj është shumë vonë për nxjerrjen e akteve nënligjore.
Unë i miratojë ndryshimet përkatëse, por duhet të theksoj se nuk është policia mbreti i këtyre veprimeve që sekuestron, është gjykata”, tha Braho.
Prej gati 3 javësh në terren ka nisur zbatimi i aktit normativ, ku i kërkohet subjekteve të ndryshme, kryesisht persona të dënuar për vepra të rënda penale që të deklarojnë pasuritë që kanë dhe burimin e tyre.
