Fondet e AKUM të Alqi Bllakos/ Bashkia Pukë, tender 800 mijë USD pa garë për ujësjellësin

Nga Boldnews.al

Bashkia e Pukës ka shpallur së fundmi rezultatet e një tenderi, me vlerë 700 mijë USD, për rikonstruksionin e ujësjellësit të qytetit”, në një procedurë pa konkurencë.

Në Janar 2020, Bashkia e qytetit verior ka shpallur fitues të tenderit bashkimin e operatorëve “KAEXh” dhe “Almo Konstruksion”. Ky bashkim kompanish ka ofruar vlerën 77.2 milionë lekë të reja pa TVSH (rreth 800 mijë USD), për “optimizimin e rrjetit të ujësjellësit-sistemimit me matës të konsumatorëve”.

Në këtë tender kanë marrë pjesë edhe dy konkurentë të tjerë, e konkretisht “Senka” dhe “Delia Impeks”. Në bazë të të dhënave zyrtare, këto dy operatorë janë skualifikuar, pasi nuk kanë paraqitur ofertë dhe asnjë dokumentacion të kërkuar nga Autoriteti Kontraktor-Bashkia Pukë.

Praktikisht, rezulton se dy kompanitë e skualifikuara janë përfshirë “vetëm për numër” në këtë procedurë, një tender ndër më të shtrenjtit për Bashkinë e Pukës.

Vlera e tenderit i tejkalon mundësitë financiare të Bashkisë veriore dhe, për këtë arsye, përmirësimi i rrjetit të ujësjellësit të Pukës do të realizohet me fondet e qeverisjes qëndrore.

Ministria e Financave e ka përfshirë investimin në Ujësjellësin e Pukës në listën e investimeve publike për periudhën 2020-2022 me fonde të brendshme.

Fondet qeveritare për ndërtimin dhe përmirësimin e rrjeteve të ujit të pijshëm kanalizohen nëpërmjet Agjencisë Kombëtare të Ujësjellës-Kanalizime dhe Mbetjeve Urbane (AKUM), të drejtuar nga Alqi Bllako.

“Boldnews.al” ka raportuar më parë edhe për një tjetër tender të dyshimtë, me vlerë 5 milionë dollarë, të lëvruar nga AKUM-i i Bllakos, për ndërtimin e Ujësjellësit të Belshit.

LEXO EDHE  Shtyhen me 5 muaj lejet e qëndrimit për shqiptarët në Greqi

Edhe në atë rast, fondi i lëvruar nga AKUM-i për Bashkinë e Belshit i kaloi një bashkimi operatorësh, pasi dy garuesit e tjerë u skualifikuan.

Boldnews.al” ka identifikuar disa tendera me fondet e lëvruara nga institucioni i drejtuar nga Alqi Bllako, të zhvilluar nga njësitë e qeverisjes vendore, të cilët përfshihen në atë që konsiderohen “procedura me flamuj të kuq”.

Ekspertët financiarë ngrenë “flamurin e kuq” në ato raste kur në tendera, sidomos ato me vlera të konsiderueshme, merr pjesë vetëm një konkurent ose shpallet fitues operatori ekonomik që mbetet i vetëm në garë.

Një gjë e tillë ka ndodhur edhe në tenderin e zhvilluar nga Bashkia Pukë për “optimizimin e ujësjellësit”.

Megjithëse, formalisht, këto lloj tenderash konsiderohen të rregullt, ata gjithnjë shoqërohen me dyshimet për abuzimin me fondet publike dhe procedura të paracaktuara.

Së fundmi, “Boldnews.al” ka konstatuar një seri procedurash prokurimi të dyshimta, ku Agjencia Kombëtare e Ujësjellës-Kanalizimeve është përfshirë direkt apo indirekt.

Rasti më tipik është tenderi i zhvilluar nga Agjencia Kombëtare e Ujësjellës-Kanalizimeve për mbylljen e landfillit të Porto-Romanos në Durrës, i cili tashmë është objekt hetimi nga Prokuroria e Posaçme Anti-Korrupsion (SPAK).

Dyshimet/ Bashkia Belsh i hapi rrugën “Vëllezërve Hysa” për tenderin 5 mln USD të ujësjellësit