Nga Boldnews.al
Bashkia e Pukës ka shpallur së fundmi rezultatet e një tenderi, me vlerë 700 mijë USD, për rikonstruksionin e ujësjellësit të qytetit”, në një procedurë pa konkurencë.
Në Janar 2020, Bashkia e qytetit verior ka shpallur fitues të tenderit bashkimin e operatorëve “KAEXh” dhe “Almo Konstruksion”. Ky bashkim kompanish ka ofruar vlerën 77.2 milionë lekë të reja pa TVSH (rreth 800 mijë USD), për “optimizimin e rrjetit të ujësjellësit-sistemimit me matës të konsumatorëve”.
Në këtë tender kanë marrë pjesë edhe dy konkurentë të tjerë, e konkretisht “Senka” dhe “Delia Impeks”. Në bazë të të dhënave zyrtare, këto dy operatorë janë skualifikuar, pasi nuk kanë paraqitur ofertë dhe asnjë dokumentacion të kërkuar nga Autoriteti Kontraktor-Bashkia Pukë.
Praktikisht, rezulton se dy kompanitë e skualifikuara janë përfshirë “vetëm për numër” në këtë procedurë, një tender ndër më të shtrenjtit për Bashkinë e Pukës.
Vlera e tenderit i tejkalon mundësitë financiare të Bashkisë veriore dhe, për këtë arsye, përmirësimi i rrjetit të ujësjellësit të Pukës do të realizohet me fondet e qeverisjes qëndrore.
Ministria e Financave e ka përfshirë investimin në Ujësjellësin e Pukës në listën e investimeve publike për periudhën 2020-2022 me fonde të brendshme.
Fondet qeveritare për ndërtimin dhe përmirësimin e rrjeteve të ujit të pijshëm kanalizohen nëpërmjet Agjencisë Kombëtare të Ujësjellës-Kanalizime dhe Mbetjeve Urbane (AKUM), të drejtuar nga Alqi Bllako.
“Boldnews.al” ka raportuar më parë edhe për një tjetër tender të dyshimtë, me vlerë 5 milionë dollarë, për ndërtimin e Ujësjellësit të Belshit.
Edhe në atë rast, fondi i lëvruar nga AKUM-i për Bashkinë e Belshit i kaloi një bashkimi operatorësh, pasi dy garuesit e tjerë u skualifikuan.
Ekspertët financiarë ngrenë “flamurin e kuq” në ato raste kur në tendera, sidomos ato me vlera të konsiderueshme, merr pjesë vetëm një konkurent ose shpallet fitues operatori ekonomik që mbetet i vetëm në garë.
Një gjë e tillë ka ndodhur edhe në tenderin e zhvilluar nga Bashkia Pukë për “optimizimin e ujësjellësit”.
Megjithëse, formalisht, këto lloj tenderash konsiderohen të rregullt, ata gjithnjë shoqërohen me dyshimet për abuzimin me fondet publike dhe procedura të paracaktuara.
Dyshimet/ Bashkia Belsh i hapi rrugën “Vëllezërve Hysa” për tenderin 5 mln USD të ujësjellësit
